Yanditswe na: NDAYISENGA Clement
13/02/2026 12:36
Urukiko Rwisumbuye rwa Nyarugenge rwaburanishije ubujurire bwatanzwe n’Ubushinjacyaha ku cyemezo cy’Urukiko rw’Ibanze rwa Nyamata cyategetse ko Sheikh Bahame Hassan arekurwa by’agateganyo agakurikiranwa ari hanze.
Sheikh Bahame Hassan, wari Umuhuzabikorwa w’Ikigo Ngororamuco cya Gitagata, akurikiranyweho ibyaha birimo gusaba cyangwa gukora ishimishamubiri rishingiye ku gitsina ndetse no gukoresha ububasha ahabwa n’itegeko mu nyungu ze bwite.
Mu kirego cyatanzwe, Ubushinjacyaha buvuga ko Bahame yaba yarasambanyaga abakobwa bagororerwaga muri icyo kigo, akabizeza inyungu zirimo kubaha amafaranga y’igishoro no kubarekura mbere y’igihe cyateganyijwe.
Buvuga kandi ko abatabyemeraga yabakangishaga kubashyikiriza inzego z’umutekano no kubateza ibihano byisumbuyeho.
Mu iburanisha ryabereye mu muhezo, Ubushinjacyaha bwagaragarije urukiko ko iperereza rimaze kugera ku rwego rushimangira impamvu zikomeye zituma akekwaho ibyaha, bushingiye ku buhamya bw’abatangabuhamya batandukanye barimo abakoranaga na we, abakobwa bagororwaga i Gitagata n’abandi bantu batandukanye.
Ubushinjacyaha bwasabye ko yafungwa by’agateganyo iminsi 30 mu gihe iperereza rigikomeje, buvuga ko ashobora kuribangamira cyangwa akatoroka ubutabera bitewe n’uburemere bw’ibyaha akurikiranyweho.
Ku rundi ruhande, Sheikh Bahame yahakanye ibyaha byose aregwa, avuga ko nta mukobwa yigeze asambanya, asaba urukiko kumurenganura.
Ku wa 13 Mutarama 2026, Urukiko rw’Ibanze rwa Nyamata rwari rwategetse ko akurikiranwa ari hanze, ruvuga ko nta mpamvu zikomeye zatanzwe zituma akekwaho ibyaha.
Nyuma y’icyo cyemezo, Ubushinjacyaha bwahise bujurira, busaba ko akurikiranwa afunzwe by’agateganyo.
Iburanisha ry’ubujurire ryabaye kuri uyu wa Kane, tariki ya 12 Gashyantare 2026, rimara amasaha abiri, impande zombi zitanga ibisobanuro byazo. Icyemezo cy’Urukiko Rwisumbuye rwa Nyarugenge giteganyijwe gusomwa ku wa 19 Gashyantare 2026.
Nyuma y'uko Sheikh Bahame Hassan afunguwe by'agateganyo, ubwo yiteguraga kujya mu kazi ku wa Mbere, tariki ya 19 Mutarama 2026, nk'uko amategeko abimwemerera yatunguwe no gusabwa kujya ku Kibuye (mu Karere ka Karongi) ku biro by'Ikigo cy'Igihugu cy'Igororamuco (NRS) akandika yegura ku nshingano ze.
Ku wa 22 Ukuboza 2025, Urwego rw'Igihugu rw'Ubugenzacyaha (RIB), ni bwo rwatangaje ko rwataye muri yombi Bahame Hassan, wari Umuhuzabikorwa w'Ikigo Ngororamuco cya Gitagata ukekwaho gukora icyaha cyo gukoresha ububasha ahabwa n’itegeko mu nyungu bwite no gusaba cyangwa gukora ishimishamubiri rishingiye ku gitsina kuri bamwe mu baba baje kugororerwa muri icyo kigo.
Like This Post? Related Posts
