Yanditswe na: NDAYISENGA Clement
26/02/2026 07:44
Polisi y’u Rwanda ikorera mu Mujyi wa Kigali, yatangaje ko umugore uherutse kugaragara mu mashusho akubita umugabo we inshyi, yatawe muri yombi ndetse dosiye ye ikaba yaratangiye gukorwa kugira ngo ishyikirizwe u ubugenzacyaha.
Ibi byabereye mu Murenge wa Ndera, ku Mulindi, mu karere ka Gasabo, mu Mujyi wa Kigali, aho basanzwe batuye. Umuvugizi wa Polisi y’u Rwanda mu Mujyi wa Kigali, CIP Gahonzire Wellars, yatangaje ko uwo mugore yafashwe ku wa 25 Gashyantare 2026, akajyanwa kuri Sitasiyo ya Polisi ya Ndera.
Yafashwe nyuma y'uko ku wa 21 Gashyantare 2026, ku mbuga nkoranyambaga hakwirakwiye amashusho y’umugore wari mu gahinda akubita umugabo we inshyi. Muri ayo mashusho y’amasegonda 25, umugore ahetse umwana yubahuka umugabo we akamukubita inshyi eshatu ku matama ndetse n’umugeri, mu gihe umugabo we agerageza gukomeza kuganira na we atanga icyifuzo cyo gutaha.
CIP Gahonzire yavuze ko umugore yafashwe atari yagerageje guhunga, yongeraho ko amakimbirane hagati y’uyu mugore n’umugabo we yari ashingiye ku mutungo w’urugo, ariko akaba yatanze inama ku banyarwanda gukemura amakimbirane mu buryo bw’amahoro, aho kubyitwaramo nabi.
Yagize ati, “Kurwana cyangwa gukora ibindi bikorwa nk’ibyo ntabwo ari cyo gisubizo. Ibi si byo bikwiriye gukorwa mu muryango nyarwanda. Umuryango nyarwanda ugomba gukemura amakimbirane mu buryo bw’inzego z’ubuyobozi."
Amakimbirane mu miryango mu Rwanda akomeje kwiyongera. Ubushakashatsi bwakozwe n'Urwego rw’Imiyoborere (RGB) mu 2017 bwagaragaje ko amakimbirane yari hejuru ya 50% by’imiryango yose mu gihugu, naho mu 2019 ayo makimbirane yari ageze ku kigero cya 70.39%.
Minisiteri y’Uburinganire n’Iterambere ry’Umuryango nayo yagaragaje ko ibibazo bitandukanye byaba nk’ubusinzi, ubumenyi buke mu by’amategeko, n'ubusumbane hagati y’umugore n’umugabo ari byo bitera amakimbirane mu miryango.
Icyaha cyo gukubita no gukomeretsa kiri mu byaha byiganje mu nkiko z'u Rwanda
Raporo y’Urwego rw’Ubucamanza y'umwaka wa 2024/2025 yagaragaje ko ibyaha byiganje muri sosiyete nyarwanda birangajwe imbere n’ubujura, mu gihe icyaha cyo gukubita no gukomeretsa ku bushake kiza ku mwanya wa kabiri.
Iki cyaha giteganywa n’itegeko riteganya ibyaha n’ibihano muri rusange, aho riteganya ko umuntu, ubishaka, ukomeretsa undi, umukubita cyangwa umusagarira ku buryo bwa kiboko bubabaje aba akoze icyaha.
Iyo abihamijwe n’urukiko, ahanishwa igifungo kitari munsi y’amezi atandatu ariko kitarenze umwaka 1 n’ihazabu itari munsi ya 100.000 Frw ariko itarenze 300.000 FRW.
