Yanditswe na: NDAYISENGA Clement
27/02/2026 13:11
Ingabo za Repubulika Iharanira Demokarasi ya Congo (Forces armées de la République démocratique du Congo – FARDC), zagabye igitero gishya cyo mu kirere ku mugoroba wo ku wa Kane, tariki ya 26 Gashyantare 2026, zigamije ibirindiro by’inyeshyamba za AFC/M23 mu gace ka Masisi, mu Ntara ya Kivu y’Amajyaruguru.
Amakuru aturuka mu baturage b’aho byabereye avuga ko icyo gitero cyabaye ahagana saa kumi n’ebyiri z’umugoroba (18h00) mu gace ka Isiro, i Nyabiondo. Indege itagira umupilote (drone) yateye ibisasu ku birindiro by’inyeshyamba za M23, humvikana urusaku rukomeye rw’iturika rwageze no mu duce duturanye.
Iki gitero cyateje ubwoba bwinshi mu baturage ba Nyabiondo, agace kamaze igihe kibasirwa n’imirwano ihanganishije FARDC n’inyeshyamba za AFC/M23.
Abatangabuhamya bavuga ko nyuma y’iturika, abaturage bihutiye kwihisha mu ngo zabo batinya ko hashobora gukurikiraho ibindi bitero cyangwa kwihorera. Mu kanya gato nyuma y’icyo gitero, nta bantu bari bakigaragara mu mihanda.
Kugeza ubu, nta mibare y’abahitanywe cyangwa abakomeretse iratangazwa ku mugaragaro. Icyakora, amakuru ava mu baturage agaragaza ko aho igitero cyagabwe ahari hari abasirikare n’ibikoresho bya gisirikare, bikaba bituma hakekwa ko hashobora kuba habaye igihombo gikomeye ku ruhande rw’inyeshyamba. Ingano nyayo y’ibyangiritse ntiramenyekana neza.
Iki gitero kiri mu rwego rwo kongera imbaraga z’ibikorwa bya gisirikare mu gace ka Masisi, aho FARDC ishaka kugabanya ubushobozi bw’imikorere bwa AFC/M23, ikorera mu duce dutandukanye twa Kivu y’Amajyaruguru.
Twibutse ko kugeza mu mpera za 2025, nibura ibindi birindiro bitatu by’inyeshyamba byari byarasenywe n’ibitero byo mu kirere i Nyabiondo, bigaragaza ko ingabo za Congo zikomeje kongera gukoresha imbaraga z’indege muri aka gace gafite akamaro kanini mu bya gisirikare.
Muri rusange, umutekano ukomeje kuba muke muri aka gace, aho abaturage ari bo bakomeje kugerwaho n’ingaruka z’imirwano isubira kenshi hagati y’impande zihanganye.
Like This Post? Related Posts
