• Ngarambe Romeo yagizwe Umuyobozi Mukuru wa Capital Market Authority

Ngarambe Romeo yagizwe Umuyobozi Mukuru w’Urwego rw’u Rwanda Rugenzura Isoko ry’Imari n’Imigabane (Capital Market Authority-CMA).

Ngarambe yatangiye izi nshingano mu gihe uru rwego rukomeje gushyira mu bikorwa gahunda zo kubaka isoko ritajegajega kandi riha bose amahirwe y’ishoramari rirambye kandi rikagira uruhare mu kuzamura ubukungu bw’igihugu.

Umuyobozi w’Inama y’Ubuyobozi ya CMA, Marc Holtzman yagize ati: “Romeo afite uburambe bw’imyaka irenga 13 nk’umuyobozi mu bijyanye n’imari n’ishoramari ku rwego mpuzamahanga, akaba yaranagaragaje ubushobozi mu guteza imbere ubucuruzi, imikorere y’amasoko y’imari n’imigabane, ndetse no gutanga inama mu by’imari mu bigo mpuzamahanga. Afite ubunararibonye mu gutegura ingamba mu by’imari, gushimangira imiyoborere myiza no gushyiraho ibipimo by’imikorere bihuye n’intego z’ibigo, ari na ko yubahiriza amahame yo hejuru ajyanye n’iyubahirizwa ry’amabwiriza.”

Minisitiri w’Imari n’Igenamigambi, Yusuf Murangwa yagize ati: “Bwana Ngarambe yagaragaje ubushobozi budasanzwe mu kuyobora amatsinda akorera hamwe mu nzego zitandukanye, gutanga isesengura rishingiye ku makuru rifasha abafata ibyemezo ku rwego rwo hejuru, kubaka ubufatanye bw’ingenzi no kunoza imikorere mu bihe bisaba guhanga ibisubizo kandi byita ku bakiriya.”

Mbere yo kugirwa Umuyobozi Mukuru wa CMA, Ngarambe yari mu myanya y’ubuyobozi bukuru mu rwego rw’imari ku rwego mpuzamahangamuri Corning Inc., aho yari ashinzwe igenamigambi ry’ingengo y’imari, iteganyabikorwa ry’imari, raporo z’imari, isesengura ry’ishoramari n’ikorwa ry’ingamba z’imiyoborere mu bikorwa bitandukanye. Yanabaye kandi Senior Business Risk Consultant muri Deloitte & Touche LLP, aho yayoboye inshingano zijyanye n’amasoko y’imari n’imigabane ndetse no gutanga inama, harimo igenzura ryimbitse ry’ishoramari, isesengura ry’imiterere y’inguzanyo n’imari n’ibikorwa byo kurengera inyungu z’abashoramari.

Ngarambe afite impamyabumenyi y’icyiciro cya kabiri cya kaminuza (Master of Science) mu Ibaruramari yakuye muri Binghamton University, ndetse n’impamyabumenyi y’icyiciro cya mbere cya kaminuza (Bachelor of Science) mu Buyobozi bw’Ubucuruzi yakuye muri Toccoa Falls College. Ni n’umunyamwuga wemewe mu micungire y’imishinga (Project Management Professional – PMP).

Hortense Mudenge, Umuyobozi Mukuru wa Rwanda Finance akaba n’Umuyobozi Wungirije w’Inama y’Ubuyobozi ya CMA yavuze ko Ngarambe kuba abaye Umuyobozi wa CMA ari intambwe nziza. Yagaragaje ko ubufatanye buzarushaho kunoga hagati ya Kigali International Financial Centre, Isoko ry’Imari n’Imigabane n’Urwego rw’u Rwanda Rugenzura Isoko ry’Imari n’Imigabane bizafasha mu kuzana mu Rwanda ishoramari mpuzamahanga no kurushaho kuzamura ubushobozi bw’isoko ry’imari n’imigabane ry’u Rwanda ku rwego mpuzamahanga.

Urwego rw’u Rwanda Rugenzura Isoko ry’Imari n’Imigabane (Capital Market Authority – CMA) rufite inshingano zikomeye zo guteza imbere, kugenzura, no gukurikirana isoko ry’imari n’imigabane mu Rwanda kugira ngo rikore mu mucyo, kandi ribe ryizewe. Rifite kandi inshingano zo kurinda abashoramari hakumirwa ibikorwa by’uburiganya cyangwa imyitwarire itari myiza ku isoko ry’imari, bityo bikarinda abashoramari (cyane cyane abato) guhomba binyuze mu makosa y’abandi. 

 

Like This Post?

• Share On:

Related Posts

---