• Doha: Tshisekedi yagaragaje ko RDC ishyigikiye Qatar mu bihe by’umutekano muke mu Karere

Perezida wa Repubulika Iharanira Demokarasi ya Congo, Félix Tshisekedi, ari mu ruzinduko i Doha, yatangaje ko igihugu ayoboye gihagaze ku ruhande rwa Qatar mu bihe by’umutekano muke uri mu karere k’Uburasirazuba bwo Hagati nyuma y’uko Amerika na Israel bateye Iran.

Mu biganiro yagiranye n’Umuyobozi wa Qatar, Tamim bin Hamad Al Thani, Perezida Tshisekedi yavuze ko RDC ishyigikiye Qatar mu guhangana n’ibyo yise gukomeza guterwa n’Iran, haba kuri Qatar ndetse no ku bindi bihugu byo muri ako karere. Yashimangiye ko ashyigikiye ingamba Qatar iri gufata zo kurinda ubusugire bwayo, umutekano w’igihugu n’abaturage bayo.

Emir wa Qatar yashimiye cyane iyi myitwarire ya RDC, agaragaza ko bishimangira umubano mwiza uri hagati y’ibihugu byombi ndetse n’ubufatanye bugenda bwiyongera.

Impande zombi zongeye gushimangira ubushake bwo guteza imbere amahoro n’umutekano mu karere, ndetse zinaganira ku mubano w’ibihugu byombi n’uburyo wakongerwamo imbaraga, cyane cyane mu by’ubukungu n’ishoramari.

Iyi nama yanitabiriwe n’abayobozi batandukanye ba Qatar, barimo umuyobozi wa Diwan y’Emir, Abdullah bin Mohammed Al Khulaifi, ndetse na Minisitiri w’Ububanyi n’Amahanga wungirije, Mohammed bin Abdulaziz Al Khulaifi.

Ku ruhande rwa Congo, mu bitabiriye harimo intumwa yihariye ya Perezida, Mambo Sita, umujyanama we wihariye Jean Claude Kabongo, ndetse n’abandi bayobozi bakuru batandukanye.

Like This Post?

• Share On:

Related Posts

---