Yanditswe na: NSENGIYUMVA J Damascene
09/05/2026 19:34
Leta Zunze Ubumwe za Amerika zamaganye igitero cya drones ingabo za Repubulika Iharanira Demokarasi ya Congo zagabye muri santere ya Mushaki, Teritwari ya Masisi mu Ntara ya Kivu y’Amajyaruguru.
Ihuriro AFC/M23
ryatangaje ko iki gitero cyagabwe ku basivili bari mu isoko rya Mushaki ku
gicamunsi cyo ku wa 8 Gicurasi 2026, kigapfiramo abagera kuri 20, abandi 57
barakomereka.
Umuvugizi wa AFC/M23, Lawrence Kanyuka, yagize ati “Imibare y’agateganyo igaragaza ko hapfuye abasivili nibura 20, abandi 57 barakomereka, barimo abagore, abana n’abandi banyantege nke. Iki gitero kigambiriwe ku basivili kigize ibyaha by’intambara n’ibyibasira inyokomuntu.”
Kanyuka yasobanuye ko iki gitero cyakurikiye ibindi ingabo za
Leta ya RDC zagabye mu bice bitandukanye muri uku kwezi, birirmo Gakenke,
Rugezi na Mikenke muri Komini Minembwe, Kalenga muri Masisi Lumbishi muri
Kalehe, byose byari bigambiriye abasivili.
AFC/M23 yasabye abahuza n’abashyigikiye ibiganiro by’amahoro
barimo Qatar, Amerika n’umuryango wa Afurika Yunze Ubumwe kwita kuri iki
kibazo, ishimangira ko ifite uburenganzira bwo guhagarika ibi bitero.
Kuri uyu wa 9 Gicurasi, Ibiro by’Umunyamabanga wa Amerika
wungirije ushinzwe ubufatanye na Afurika byamaganye igitero cyagabwe muri
Mushaki n’ubwicanyi buri gukorerwa muri Kivu y’Amajyepfo.
Byagize biti “Amerika yamaganye igitero cya drone cyagabwe uyu
munsi muri Mushaki, Kivu y’Amajyaruguru n’ubwicanyi buri gukorerwa hafi ya
Uvira muri Kivu y’Amajyepfo.”
Amerika yasabye “impande zose” koroherana, zikubahiriza agahenge
nk’uko zabisezeranye, zikarinda abasivili, zikajya mu biganiro by’amahoro.
