Yanditswe na: NDAYISENGA Clement
04/06/2026 11:35
Ikipe y’Igihugu y’u Rwanda, Amavubi, ntikigomba gukinira imikino ya gicuti mpuzamahanga yari iteganyijwe kubera mu mujyi wa Marrakech muri Maroc muri uku kwezi kwa Kamena, nyuma y’icyemezo cyafashwe n’Ishyirahamwe ry’Umupira w’Amaguru muri Maroc (FRMF) gishingiye ku mpamvu z’umutekano.
Mu itangazo ryashyizwe ahagaragara n’Ishyirahamwe ry’Umupira w’Amaguru mu Rwanda, FERWAFA, ryatangaje ko ryamenyeshejwe na FRMF ko iyo mikino itagishoboka kubera impamvu z’umutekano, nubwo hatatangajwe ibisobanuro birambuye ku byateye icyo cyemezo.
Amakuru aturuka mu nzego zitandukanye avuga ko icyo cyemezo gishobora kuba gifitanye isano n’ingamba zo kwirinda ikwirakwira ry’indwara ya Ebola, nyuma y’uko hagaragaye ubwiyongere bw’impungenge ku bwandu bw’iyo ndwara mu karere. Icyakora, ubuyobozi bw’u Rwanda bwakomeje kugaragaza ko nta bwandu bwa Ebola buri ku butaka bw’igihugu.
Mbere y’uko iyo gahunda ihagarikwa, bamwe mu bagize delegasiyo y’Amavubi, barimo abakinnyi n’abatoza bayobowe na Stephen Constantine, bari bamaze kugera i Marrakech kugira ngo batangire imyiteguro y’iyo mikino.
Nyuma y’ihagarikwa ry’iyo gahunda, Amavubi yahise yimurira umwiherero wayo i Cairo mu Egypt, aho azakomereza imyitozo kugeza mu cyumweru gitaha mu rwego rwo kwitegura imikino mpuzamahanga iri imbere.
Biteganyijwe ko Amavubi azakina umukino wa gicuti na Comoros ku wa Gatandatu, mbere yo guhura na Tanzania ku wa 9 Kamena 2026.
Iyi mikino iri mu rwego rwo gukomeza gutegura ikipe mbere y’imikino yo gushaka itike y’Igikombe cya Afurika cy’Ibihugu cya 2027, 2027 Africa Cup of Nations qualification. U Rwanda ruri mu itsinda K hamwe na Cape Verde, Liberia na Mali.
Amakuru kandi agaragaza ko icyemezo cya FRMF kitarebye u Rwanda gusa, ahubwo cyagize ingaruka no ku yandi makipe y’ibihugu byari byateganyijwe gukorera imyiteguro cyangwa gukinira imikino ya gicuti muri Maroc, arimo u Burundi, Tanzania, Uganda na Madagascar.
Nubwo gahunda yahindutse mu buryo butunguranye, FERWAFA yemeza ko imyiteguro y’Amavubi yo gushaka itike ya CAN 2027 ikomeje nta nkomyi, kandi ko ikipe ikomeje gahunda zayo nk’uko zari ziteganyijwe.
Like This Post? Related Posts
