• UB 40 yageze i Kigali aho itegerejwe mu gitaramo mbaturamugabo

Abahanzi bagize itsinda rya UB40 Ft Ali Campbell bategerejwe mu gitaramo bagomba gukorera muri BK Arena mu ijoro ryo ku wa 9 Kamena 2026 ryageze i Kigali mu gitondo cy’umunsi.

Aba bahanzi bageze i Kigali bavuye muri Afurika y’Epfo aho bakoreye igitaramo mu Mujyi wa Capetown ku wa 2 Kamena 2026.

Ku wa 4 Kamena 2026 aba bahanzi bataramiye mu Mujyi wa Durban mu gihe ku wa 6-7 Kamena 2026 bataramiye mu Mujyi wa Pretoria.

Byari biteganyijwe ko abagize itsinda rya UB40 Ft Ali Campbell bagera i Kigali ku wa 8 Kamena 2026 icyakora kubera akazi bari bamazemo iminsi basabye ko babanza kuruhuka bakahagera mu gitondo cyo ku wa 9 Kamena 2026.

Aba bahanzi bagaragazaga umunaniro mwinshi, bahise berekeza kuri hoteli bagombaga gucumbikamo kugira ngo baruhuke mbere y’uko bajya gusuzuma ibyuma igitaramo kigatangira bameze neza.

UB40 ni itsinda ryashinzwe n’abasore bo mu Bwongereza bari inshuti mu 1978. Aba bakoze iyo bwabaga binyuze mu miziki yabo, UB40 iba itsinda rikomeye ku Isi.

Mu 2008 iri tsinda ryajemo umwuka mubi, uwitwa Ali Campbell yaje kurisezeramo kubera kutumvikana n’abarebereraga inyungu zaryo ndetse mu 2014 afata icyemezo cyo gushinga UB40 ye.

Icyo gihe abarimo Jimmy Brown, Robin Campbell, Earl Falconer na Norman Hassan bashinganye iryo yari avuyemo, banze ko atwara izina ryabo ari na byo byatumye Ali Campbell yita itsinda rye ‘UB40 Ft Ali Campbell’ ari nayo yamaze kugera i Kigali aho bafite igitaramo.

Ali Campbell wari uyoboye abaririmbyi ba UB40, akimara kuva muri iri tsinda, abo barishinganye bamusimbuje umuvandimwe we Duncan Campbell wariyoboye kugeza mu 2021 ubwo yasezeraga kubera imbaraga nke z’umubiri we ahita asimbuzwa Matt Doyle.

Mu 2014 ubwo yashingaga itsinda rye, Ali Campbell yahise aryinjizamo Terence Wilson wamamaye nka Astro ndetse na Mickey Virtue na we waje kurisezeramo mu 2018. Astro yitabye Imana mu 2021.

Kugeza ubu UB40 igizwe n’abacuranzi barimo Jimmy Brown, Robin Campbell, Earl Falconer, Norman Hassan, Matt Doyle, Jahred Gordon, Gilly G, Matt Campbell, Martin Meredith, Ian Thompson na Laurence Parry.

UB40 yananyuzemo abandi nka Ali Campbell, Yomi Babayemi, Jimmy Lynn, Brian Travers, Mickey Virtue, Astro, Duncan Campbell.

Like This Post?

• Share On:

Related Posts

---