Yanditswe na: NSANZABERA Jean Paul
15/06/2026 09:08
Umuhanzi
w'ikirangirire muri Tanzania, Diamond Platnumz, yongeye kugaragaza ubupfura
n'ubucuti bwiza nyuma yo kwifuriza ibyiza uwahoze ari umukunzi we, Wema Sepetu,
nyuma yo kwibaruka umwana we wa mbere w'umuhungu yabyaranye n'umuhanzi Whozu.
Iyi nkuru
yishimiwe cyane n'abakurikira imyidagaduro muri Afurika y'Iburasirazuba kuko
Wema Sepetu yari amaze imyaka myinshi agaragaza icyifuzo cyo kuba umubyeyi
ndetse anavuga kenshi urugendo rutoroshye yanyuzemo mu gushaka urubyaro.
Ku wa 13
Kamena 2026, Wema Sepetu na Whozu batangaje ko bibarutse umwana w'umuhungu,
ibintu byahise bikwirakwira ku mbuga nkoranyambaga.
Mu butumwa
yashyize kuri Instagram, Wema yasangije abakunzi be ifoto igaragaza akaguru
gato k'umwana we, agaragaza ibyishimo byo kuba ageze ku nzozi yari amaranye
imyaka myinshi
Whozu na we
yashimiye Imana ndetse n'abantu bose bakomeje kubashyigikira no kubasengera
muri uru rugendo. Yavuze ko ibyo bagezeho ari ikimenyetso cy'ubuntu bw'Imana
ndetse ko amasengesho yabo yasubijwe.
Nyuma yo
kubona aya makuru, Diamond Platnumz yanyujije ubutumwa ku rubuga rwa Instagram
ashima Wema Sepetu na Whozu ku mwana bibarutse. Mu butumwa bwe yagize ati:
"Nishimiye
Wema na Whozu ku kuza kw'uyu mwana. Imana imurinde, imuhe umugisha kandi
imukuze afite ubuzima bwiza n'intsinzi."
Ubu butumwa
bwafashwe nk'ikimenyetso cy'ubwubahane hagati y'abahoze bakundana. Nubwo
Diamond na Wema batandukanye hashize imyaka myinshi, benshi bagaragaje ko kuba
yaramwoherereje ubutumwa bw'ishimwe byerekana ko nta rwango rugihari hagati
yabo.
Urugendo rwa
Wema Sepetu rwari rwuzuyemo amarangamutima
Mu myaka
yashize, Wema Sepetu yakunze kuvuga ku ngorane yahuye na zo mu gushaka kubyara.
Yigeze gutangaza ko yari ageze aho yumva ashobora kutazigera aba umubyeyi,
ariko akomeza kwizera Imana no gutegereza igihe cyayo.
Ivuka ry'uyu
mwana ryafashwe nk'intsinzi ikomeye kuri we ndetse no ku bakunzi be benshi
bakurikiranye urugendo rwe imyaka myinshi.
Abahanzi, abanyamakuru n'ibindi byamamare
bitandukanye bo muri Afurika y'Iburasirazuba bamwoherereje ubutumwa bwo
kumwifuriza ibyiza muri uru rugendo rushya rwo kuba umubyeyi.
Nyuma y'uko
ubutumwa bwa Diamond bushyizwe ahagaragara, abantu benshi ku mbuga
nkoranyambaga bamushimiye bavuga ko yagaragaje umutima mwiza n'ubunyamwuga.
Bamwe
bagaragaje ko nubwo urukundo rwabo rwarangiye kera, kuba yarifurije Wema ibyiza
ari ikimenyetso cy'uko abantu bashobora gutandukana ariko bakagumana icyubahiro
n'ubucuti bwiza.
Uyu mwana wa
mbere wa Wema Sepetu yaje nk'igisubizo ku myaka myinshi yo gutegereza, bityo
inkuru ye ikaba yarabaye isoko y'ibyishimo ku muryango we, inshuti ze ndetse
n'abafana be hirya no hino muri Afurika.
