Yanditswe na: NDAYISENGA Clement
30/06/2026 11:16
Repubulika Iharanira Demokarasi ya Congo (RDC) ikomeje guhangana n'icyorezo cya Ebola gikomeje guhitana ubuzima bwa benshi, aho imibare ya Minisiteri y'Ubuzima igaragaza ko kugeza ku wa 28 Kamena 2026, abantu 1,307 bamaze kwandura, muri bo 377 bamaze gupfa, bingana n'igipimo cy'urupfu cya 28.8%.
Abenshi mu bahitanwa n'iki cyorezo bakomoka mu Ntara ya Ituri, cyane cyane mu duce twa Mongbwalu, Bunia na Rwamapara, ari na ho hakomeje kugaragara umubare munini w'abandura.
Minisiteri y'Ubuzima ivuga ko kugeza kuri uwo munsi, abarwayi 615 bari bagikurikiranwa n'abaganga mu bigo byita ku banduye Ebola, mu gihe 180 bamaze gukira nyuma yo guhabwa ubuvuzi.
Iki cyorezo ntikikigarukira muri RDC gusa. Ku wa 15 Gicurasi 2026, Uganda na yo yatangaje ko yakibonye ku butaka bwayo, aho abantu 20 bamaze kwandura, muri bo babiri bakaba barapfuye.
Mu cyumweru gishize kandi, Minisiteri y'Ubuzima mu Bufaransa yatangaje ko habonetse umurwayi wa Ebola, uvugwa ko ari umuganga wari umaze igihe akorera ubutumwa bw'ubuvuzi mu Ntara ya Ituri muri RDC, ibintu byongeye gukangura impungenge z'uko iki cyorezo gishobora gukwira no mu bindi bihugu.
Mu rwego rwo gukaza ingamba zo kugihashya, Ikigo cya Afurika gishinzwe gukumira no kurwanya indwara (Africa CDC) ku bufatanye n'Ishami ry'Umuryango w'Abibumbye ryita ku Buzima (OMS) byateganyije ingengo y'imari ya miliyoni 518 z'Amadolari y'Amerika azifashishwa mu bikorwa byo gukumira no kurwanya Ebola ku mugabane wa Afurika.
Umuyobozi Mukuru wa Africa CDC, Dr. Jean Kaseya, yavuze ko hakenewe ibikorwa byihuse kandi bihuriweho n'ibihugu byose, ashimangira ko "Ebola yihuta cyane; Afurika igomba kuyirusha umuvuduko."
Abashinzwe ubuzima bavuga ko kimwe mu bikorwa bitanga umusaruro mu guhagarika ikwirakwira ry'icyorezo ari ugukurikirana abantu bahuye n'abarwaye. Kugeza ubu, iki gikorwa kimaze kugerwaho ku gipimo cya 81.3%, nubwo hagikenewe kongera ubufatanye bw'abaturage.
Kugeza ubu, Ebola yo mu bwoko bwa Bundibugyo ni yo iri kwibasira RDC, kandi nta rukingo rwemewe cyangwa umuti wihariye wayo uraboneka. Ni yo mpamvu inzego z'ubuzima zishingira cyane ku gutahura abanduye hakiri kare, kubashyira mu kato, gukurikirana abo bahuye na bo no gukangurira abaturage kubahiriza amabwiriza y'isuku n'ubwirinzi.
Abaganga basaba abaturage kujya bihutira kugana ibigo nderabuzima igihe bagize ibimenyetso birimo umuriro mwinshi, umunaniro ukabije, kubabara umutwe, kuruka, gucibwamo, cyangwa kuva amaraso mu buryo budasanzwe, kuko kuvurwa hakiri kare bifasha kugabanya ibyago byo kwanduza abandi no gupfa.
Nubwo iki cyorezo gikomeje guteza impungenge, inzego z'ubuzima zemeza ko ubufatanye bw'abaturage, gukomeza gukurikirana abanduye no kubahiriza amabwiriza yo kwirinda ari byo bizafasha kugabanya umuvuduko w'ikwirakwira rya Ebola no kurokora ubuzima bwa benshi.
Like This Post? Related Posts
