Yanditswe na: NSENGIYUMVA J Damascene
01/07/2026 01:27
Inama y’Abaminisitiri yateranye kuri uyu wa Kabiri tariki ya 30 Kamena 2026 muri Village Urugwiro iyobowe na Perezida wa Repubulika, Paul Kagame, yemeje amategeko mashya n’ingamba zitandukanye zigamije guteza imbere imibereho y’abaturage, ubukungu ndetse n’imiyoborere y’igihugu.
Mu byagarutsweho harimo uko ubukungu bw’u Rwanda bwitwaye mu
gihembwe cya mbere cya 2026, aho bwazamutse ku kigero cya 10%. Guverinoma
yavuze ko iri zamuka ryatewe ahanini n’iterambere mu nzego za serivisi,
ubuhinzi n’inganda.
Inama
y’Abaminisitiri kandi yemeje imishinga y’amategeko atandukanye harimo
amasezerano hagati y’u Rwanda n’Ikigo cy’Abafaransa cy’Iterambere (AFD) agamije
gushyigikira ubuvuzi, guteza imbere ubuhinzi bugamije ubucuruzi no kongera
imibereho myiza y’abaturage.
Hanemejwe
kandi amasezerano y’imikoranire hagati y’u Rwanda na Banki Mpuzamahanga agamije
guteza imbere ibikorwa by’ubuzima no gufasha mu gukumira no guhangana n’ibibazo
by’indwara.
Mu
rwego rw’imiyoborere, Inama y’Abaminisitiri yemeje amateka mashya arimo
iryerekeye amatora y’abayobozi b’inzego z’imitegekere yegerejwe abaturage
ndetse n’iteka rigena abagize komite nyobozi z’inama z’igihugu zitandukanye.
Hari
kandi iteka rigena uburyo bw’ikoranabuhanga mu gutanga inyemezabuguzi no
kwishyuza umusoro ku nyungu z’amasosiyete ku kigero cya 0%.
Mu
rwego rw’ubutabera n’imibereho myiza, Inama y’Abaminisitiri yemeje iteka rigena
uburyo umuntu ataye hahoraho ndetse n’uburyo inyabo z’umubare w’ibyacurujwe mu
mwaka zibarwa hagamijwe korohereza ibaruramari ry’imisoro.
Iyi
nama yanemeje itangwa ry’impushya zo gucukura amabuye y’agaciro na kariyeri
ndetse inagenera uburenganzira abahagarariye ibihugu n’imiryango mpuzamahanga
mu Rwanda.
Mu bahawe uburenganzira harimo Ambasaderi wa Sudan mu Rwanda,
Mohamed Basheer Abdalla Mennawi, Ambasaderi wa Korea mu Rwanda, Huh Jungae,
uhagarariye JICA mu Rwanda, Sakamoto Atsuki, ndetse na Jim Hegarty wasabiwe
guhagararira inyungu z’u Rwanda muri Irlande.
