Yanditswe na: NDAYISENGA Clement
01/07/2026 18:54
Abantu barenga 900 bafashwe n'inzego z'umutekano muri Afurika y'Epfo nyuma y'imyigaragambyo yabaye ku wa Kabiri hirya no hino mu gihugu, yamaganaga abimukira badafite ibyangombwa byemewe n'amategeko.
Polisi yavuze ko benshi mu batawe muri yombi bakurikiranyweho ibyaha birimo ubusahuzi, ubujura, gusenya ibikorwa remezo no kurenga ku mategeko agenga abinjira n'abasohoka mu gihugu.
Iyi myigaragambyo yabaye nyuma y'uko imitwe irwanya abimukira itanze igihe ntarengwa isaba ko abimukira badafite ibyangombwa bava muri Afurika y'Epfo bitarenze ku wa 30 Kamena 2026.
Nk'uko Polisi ibitangaza, abantu 215 ni bo bafatiwe mu Ntara ya Western Cape, ari na yo yabayemo umubare munini w'abatawe muri yombi, mu gihe abandi bafatiwe mu ntara zirimo KwaZulu-Natal na Eastern Cape.
Polisi yavuze ko habaye imyigaragambyo 120 mu gihugu hose, myinshi ikaba yarabaye mu mahoro, gusa 12 muri yo yahindutse imvururu, zirimo gusahura amaduka no kwangiza ibikorwa by'abaturage.
Kubera ubukana bw'izo mvururu, Ingabo za Afurika y'Epfo zoherejwe mu Mujyi wa Johannesburg gufasha Polisi gucunga umutekano no gukumira ubusahuzi.
Mu Mujyi wa Durban, by'umwihariko mu gace ka Claremont, na ho habonetse ibikorwa byo gusahura amaduka mu ijoro ryo ku wa Kabiri.
Perezida Cyril Ramaphosa yavuze ko nubwo hari ahabaye imvururu, imyigaragambyo myinshi yakozwe mu buryo bw'amahoro kandi abaturage bakoresheje uburenganzira bwabo bwo kwigaragambya.
Yashimangiye ko Guverinoma izakomeza kubahiriza amategeko no kurinda umutekano w'abaturage bose batuye muri Afurika y'Epfo.
Mu mezi ashize, imyigaragambyo yamagana abimukira yakomeje kwiyongera mu mijyi ikomeye ya Afurika y'Epfo.
Abayitegura bavuga ko abimukira badafite ibyangombwa bagira uruhare mu kwiyongera kw'ubushomeri, ubucuruzi butemewe n'amategeko n'ibyaha, nubwo imiryango iharanira uburenganzira bwa muntu ivuga ko nta bimenyetso bihagije byerekana ko abimukira ari bo nyirabayazana w'ibyo bibazo.
Abateguye iyi myigaragambyo batangaje ko bazakomeza kuyikora buri cyumweru kugeza igihe Guverinoma izafatira ingamba zikomeye ikibazo cy'abimukira badafite ibyangombwa.
Like This Post? Related Posts
