• Abazahugura abandi gukumira ibyaha basabwe gushimangira ubufatanye n'abaturage

Komiseri w’Ishami rya Polisi rishinzwe guhuza ibikorwa bya Polisi n’abaturage, Assistant Commissioner of Police (ACP) Teddy Ruyenzi ari kumwe na SP (Rtd) Ruboneza Nkorerimana,  Umuyobozi w'Ishami rishinzwe Politiki n'iby'umutekano muri Minisiteri y’Umutekano w’imbere mu gihugu, basoje ku mugaragaro amahugurwa y'Abagize Komite z'Abaturage mu kwicungira Umutekano(CPCs) bo mu turere tugize umujyi wa Kigali.

Ni amahugurwa yasorejwe mu cyumba cy’inama cy’akarere ka Kicukiro, yari amaze amezi atatu ahabwa abazahugura abandi (Training of Trainers – ToT) yateguwe ku bufatanye na Minisiteri y’Umutekano imbere mu gihugu, Polisi y’u Rwanda n’izindi nzego z’umutekano, akaba  kandi yaratanzwe muri gahunda ngarukamwaka y’Ingabo na Polisi by’u Rwanda (COP 26) mu rwego rwo
kurushaho guteza imbere ubufatanye hagati y'inzego z'umutekano n’abaturage mu gukumira ibyaha no guteza imbere imibereho myiza.

Aya mahugurwa yaberaga mu gihugu hose, yahabwaga  abashinzwe guhuza ibikorwa bya Polisi n'abaturage ku rwego rw' umujyi wa Kigali n'Intara (RPCOs) n'uturere (DPCOs), abashinzwe imiyoborere myiza mu turere, abahagarariye urubyiruko rw’abakorerabushake mu rwego rw’uturere, abashinzwe kunganira akarere mu gucunga umutekano (DASSO) ndetse n’abahagarariye abaturage (CPCs) bagera ku 1,500 bo mu gihugu hose. 

ACP Ruyenzi yavuze ko imikorere myiza ya Polisi ishingira ku bufatanye bukomeye hagati y’inzego zishinzwe kubahiriza amategeko n’abaturage, ashimangira ko abagize  Komite z'Abaturage mu kwicungira umutekano  aribo nkingi y’ingenzi ituma ubwo bufatanye burushaho gukomera.

Yagize ati: "Umutekano rusange ni inshingano zisangiwe n’abaturage n’inzego zishinzwe kubahiriza amategeko. Mu Rwanda, Komite z'Abaturage mu kwicungira umutekano zifite uruhare rukomeye mu guhuza abaturage na Polisi kugira ngo ibibazo by’umutekano bitangweho amakuru ku gihe."

Yakomeje avuga ko izi Komite zifasha guhuza abaturage na Polisi binyuze mu kumenya ibibazo by’umutekano bibugarije, gushishikariza abaturage gutanga amakuru ku byaha n’ibikorwa bikemangwa bikimara kugaragara, gukusanya amakuru yizewe, kuyageza kuri sitasiyo ya Polisi ibegereye no gukurikirana ibibazo byatanzwe.

Ati: " Turabasaba kurushaho kuba ijisho ry’abaturage muhagarariye mu gusigasira umutekano n’ituze rusange mufatanya na bo kuko aribwo buryo bwiza mu gukumira ibyaha bitaraba."

Superintendent of Police (Rtd) Ruboneza Nkorerimana, Umuyobozi w'Ishami rishinzwe Politiki n'iby'umutekano, yasabye abagize Komite mu kwicungira umutekano kurushaho kongera imbaraga mu gukumira ibyaha bakorana bya hafi n'inzego z'umutekano ndetse n'abaturage.

Yagaragaje ko hakiri ibyaha bikigaragara mu baturage birimo ubujura, ibyaha byo gukubita no gukomeretsa akenshi bituruka ku biyobyabwenge n'inzoga zitujuje ubuziranenge bikanakurura izindi ngaruka nko gutwara inda zitateganyijwe n’abana bava mu mashuri kubera ihohoterwa mu miryango n'ibindi, asaba abagize izi Komite gukomeza ingamba zigamije guhangana n’ibi byaha bafatanya n’inzego z’umutekano mu kubigaragaza ku gihe.

SP (Rtd) Ruboneza yakomeje gushishikariza abagize izi Komite gukoresha ubumenyi bahawe muri aya mahugurwa bigisha abandi, no kugira uruhare rukomeye mu gukumira no kurwanya ibyaha ku rwego rw'umudugudu n'akagari.

Yagize ati: "Abahuguwe guhugura abandi bagomba gutegura amahugurwa ya Komite  bakifashisha ibibazo by’umutekano bihari mu buryo bufatika, banazongerera ubushobozi bwo guhangana n’ibibazo by’umutekano bishya kandi bihora bihinduka."

Aya mahugurwa yo gutegura abahugura abandi yateguwe mu rwego rwo kurushaho kongerera ubushobozi abagize Komite mu kwicungira umutekano gukomeza gushimangira ubufatanye hagati ya Polisi n’abaturage n'izindi nzego z'umutekano no guteza imbere umutekano urambye hirya no hino mu gihugu, ndetse no kubaka umuryango utekanye.

Like This Post?

• Share On:

Related Posts

---