Yanditswe na: NDAYISENGA Clement
06/07/2026 07:30
Intambara hagati y'Uburusiya na Ukraine ikomeje gufata indi ntera, aho impande zombi zakajije ibitero byifashishije misile n'indege zitagira abapilote (drones), mu gihe Perezida wa Ukraine, Volodymyr Zelensky, yaburiye abaturage ko Uburusiya buri gutegura igitero rutura gishobora kuba ku wa 07 Nyakanga 2026.
Abategetsi ba Ukraine bavuga ko abantu batanu bishwe mu gitero cy'Uburusiya cyagabwe mu ijoro ryakeye ku murwa mukuru Kyiv.
Amakuru avuga ko humvikanye nibura ibiturika 10 mu gitero cya kabiri gikozwe hakoreshejwe ibisasu bya misile na drones kuri Kyiv no mu nkengero zayo mu gihe kitarenze icyumweru kimwe.
Umuyobozi w'Umujyi wa Kyiv, Vitali Klitschko, yavuze ko hari abantu bari baheze mu magorofa yo hejuru y'inyubako y'amacumbi yarashwe muri icyo gitero.
Uburusiya na Ukraine byombi byakomeje kongera ubukana bw'ibitero byifashishije intwaro zirasa kure.
Mu karere ka Crimea kigaruriwe n'Uburusiya, umuyagankuba wacitse mu mujyi wa Sevastopol nyuma y'igitero cya Ukraine cyagabwe ku ruganda rutanga amashanyarazi ruri hafi y'uwo mujyi.
Hagati aho, Perezida Zelensky yavuze ko amakuru mashya y'ubutasi agaragaza ko Uburusiya buri gutegura igitero rutura ku wa 07 Nyakanga.
Yagize ati: "Ibi ni ibisanzwe kuri Putin… Uburusiya bushaka guteza ayandi mahano no kwica abantu benshi kurushaho. Ndabasabye kwiyubara no kumvira inzamba ziburira ibitero byo mu kirere."
Ukraine yarashe ububiko bunini bwa peteroli i St Petersburg
Perezida Zelensky yavuze kandi ko ububiko bunini bw'ibikomoka kuri peteroli bwo mu mujyi wa St Petersburg mu majyaruguru y'uburengerazuba bw'Uburusiya bwarashwe n'ingabo za Ukraine mu ijoro rishyira ku wa Gatandatu.
Yavuze ko ubwo bubiko ari ibikorwa-remezo by'ingenzi "bitanga amafaranga y'intambara y'Uburusiya." Ukraine yanatangaje ko yarashe ikigo cy'amato y'intambara y'Uburusiya kiri muri ako karere.
Guverineri wa St Petersburg, Aleksandr Beglov, yavuze ko uwo mujyi wagabweho igitero "kinini cyane" cya drones, yemera ko ububiko bwa peteroli bwarashweho ariko avuga ko nta muntu wapfuye cyangwa wakomeretse.
Mu bihe bya vuba, Ukraine yakajije umurego w'ibitero bya drones birebire igaba ku bikorwa-remezo by'ingufu by'Uburusiya, bituma ibikomoka kuri peteroli bibura mu bice byinshi by'igihugu.
Kyiv ivuga ko hafi 43% by'ubushobozi bw'Uburusiya bwo gutunganya ibikomoka kuri peteroli butagikora kubera ibyo bitero.
Icyakora, BBC ntiyashoboye kugenzura uwo mubare mu buryo bwigenga.
Ukraine ivuga ko ibigo by'Uburusiya bitunganya peteroli na gaze ari ibitero byemewe kuko Moscow yishingikiriza cyane ku mafaranga ava mu kohereza peteroli mu mahanga kugira ngo ibashe gukomeza intambara yatangiye muri Gashyantare 2022.
Ku wa Gatandatu, Perezida w'Uburusiya, Vladimir Putin, wari umaze kwemera ko ibura rya peteroli ryatewe n'ibitero bya Ukraine, yashyize umukono ku itegeko rigamije kongera ibikomoka kuri peteroli ku isoko ry'imbere mu gihugu.
Mu gitondo cyo ku wa Gatandatu, Zelensky yavuze ko aharashwe i St Petersburg no mu nkengero zaho hari mu ntera ya kilometero hafi 850 uvuye ku mupaka wa Ukraine.
Ingano y'ibyangiritse ntiyahise imenyekana, ariko videwo yatangajwe na Zelensky yagaragaje drone iguruka yerekeza aho yagombaga kurasa, nyuma hagaragara umwotsi mwinshi w'umukara uzamuka muri ako gace.
Nyuma, BBC yemeje ko ububiko bwa peteroli bw'i St Petersburg bwarashwe.
Igisirikare cya Ukraine cyavuze ko ubwo bubiko ari bumwe mu bunini cyane mu Burusiya, bufite ubushobozi bwo gutanga toni miliyoni 12.5 z'ibikomoka kuri peteroli buri mwaka.
Cyavuze kandi ko cyarashe ikigo gikomeye cy'ingabo z'amato z'Uburusiya kiri mu Nyanja ya Baltique, giherereye i Kronstadt.
Ku ruhande rw'Uburusiya, nta tangazo ryihariye ryasohotse ku byo Ukraine yavuze ko yarashe.
Guverineri Beglov yavuze ko drones 72 za Ukraine zahanuwe hejuru ya St Petersburg no mu bindi bice by'akarere ka Leningrad.
Mu gihe impande zombi zikomeje kongera ubukana bw'ibitero, impungenge zikomeje kwiyongera ko intambara ishobora gufata indi ntera no guteza ibindi bihombo ku baturage no ku bikorwa remezo by'impande zombi.
Like This Post? Related Posts
