• Côte d'Ivoire: Abarwanashyaka 6 b’ishyaka PDCI barekuwe nyuma y'amezi icyenda bafunzwe

Abayobozi batandatu bo ku rwego rw'ibanze b'ishyaka rikomeye ritavuga rumwe n'ubutegetsi muri Côte d'Ivoire, Parti Démocratique de Côte d'Ivoire (PDCI-RDA), barekuwe ku wa Mbere nyuma yo kumara amezi icyenda bafunzwe.

Aya makuru yemejwe n'umwunganizi wabo mu mategeko, Ange Rodrigue Dadje, wavuze ko barekuwe nyuma y'iburanisha ryabereye mu rukiko rushinzwe kuburanisha ibyaha by'iterabwoba.

Mu butumwa yashyize ku rubuga rwa Facebook yagize ati: "Nyuma y'iburanisha ryabaye kuri uyu wa Mbere tariki ya 20 Nyakanga, abanyamuryango ba PDCI barekuwe nyuma y'amezi icyenda bafunzwe, kandi basubiye mu miryango yabo." Gusa ntiyatangaje impamvu zishingiye ku mategeko zatumye barekurwa.

Aba bayobozi bari mu bantu benshi batavuga rumwe n'ubutegetsi bafashwe hagati ya Nzeri na Ukwakira 2025, mu gihe Côte d'Ivoire yari yitegura amatora ya Perezida yaranzwe n'ubushyamirane bwa politiki, ifatwa ry'abatavuga rumwe n'ubutegetsi n'urupfu rw'abaturage bamwe.

Muri Gicurasi uyu mwaka, abandi bayobozi babiri ba PDCI na bo bari bamaze kurekurwa, bituma umubare w'abayobozi b'iri shyaka barekuwe ugera ku munani.

Aya matora kandi yaranzwe no gukurwamo kw’abakandida bakomeye batavuga rumwe n'ubutegetsi, barimo Tidjane Thiam ndetse n'uwahoze ari Perezida Laurent Gbagbo, bose bakumiriwe kwiyamamaza binyuze mu byemezo by'inkiko.

Mu gihe cyo kwiyamamaza, abantu benshi bo mu mashyaka atavuga rumwe n'ubutegetsi barafashwe cyangwa barafungwa, harimo n'abanyapolitiki bakomeye. Abandi baturage amagana bashinjwaga kwitabira imyigaragambyo itemewe na bo bakatiwe ibihano bitandukanye, mu gihe nibura abantu icumi bahasize ubuzima.

Icyakora, Guverinoma ya Perezida Alassane Ouattara yakomeje guhakana ko ifatwa ry'abo bantu ryari rifite impamvu za politiki, ivuga ko ryakozwe hubahirijwe amategeko.

Mu ntangiriro z'uku kwezi kandi, Moïse Lida Kouassi, wabaye Minisitiri w'Ingabo ku butegetsi bwa Laurent Gbagbo, hamwe na Ibrahim Zigui, na bo barekuwe, ibintu bamwe mu basesenguzi babona nk'intambwe ishobora gufasha kugabanya umwuka mubi wa politiki muri Côte d'Ivoire.

 

Like This Post?

• Share On:

Related Posts

---