• Perezida Kagame yakiriye Ambasaderi w’Umuryango w’Ubumwe bw’u Burayi usoje manda ye mu Rwanda

Perezida wa Repubulika y'u Rwanda, Paul Kagame, kuri uyu mugoroba yakiriye muri Village Urugwiro Ambasaderi w'Umuryango w'Ubumwe bw'u Burayi (European Union - EU) mu Rwanda, Belén Calvo Uyarra, mu ruzinduko rwo kumusezeraho nyuma yo gusoza manda ye y'akazi mu Rwanda.

Uyu mubonano wabaye umwanya wo kurebera hamwe intambwe imaze guterwa mu mubano hagati y'u Rwanda n'Umuryango w'Ubumwe bw'u Burayi, ndetse no kuganira ku buryo uwo mubano wakomeza gutezwa imbere mu nzego zitandukanye.

Perezida Kagame na Ambasaderi Belén Calvo Uyarra bagarutse ku mubano umaze igihe kirekire uranga u Rwanda n'Umuryango w'Ubumwe bw'u Burayi, ushingiye ku bwubahane, ubufatanye no guteza imbere inyungu z'impande zombi.

Baganiriye ku ntambwe yatewe mu gushyira mu bikorwa imishinga itandukanye yafashije guteza imbere imibereho y'Abanyarwanda n'iterambere ry'igihugu.

Mu biganiro byabo, hibanzwe ku bufatanye mu nzego zifatwa nk'inkingi z'iterambere.

Harimo gukora inkingo (vaccine manufacturing), aho u Rwanda rukomeje gushora imari mu kubaka ubushobozi bwo gukora inkingo ku Mugabane wa Afurika hagamijwe kugabanya ukwishingikiriza ku mahanga.

Banaganiriye ku ruhare rw'u Rwanda mu bikorwa byo gushyigikira amahoro, aho igihugu gikomeje kohereza ingabo n'abapolisi mu butumwa bw'amahoro mu bihugu bitandukanye, ku bufatanye n'imiryango mpuzamahanga.

Perezida Kagame na Ambasaderi Belén Calvo Uyarra banagarutse ku masezerano y'ubufatanye mu rwego rw'amabuye y'agaciro y'ingenzi (Critical Raw Minerals Partnership).

Aya masezerano agamije guteza imbere ubucukuzi, gutunganya no kongerera agaciro amabuye y'agaciro akenewe cyane mu ikoranabuhanga rigezweho n'inganda zikora ibikoresho byifashishwa mu rwego rw'ingufu zisukuye.

Impande zombi zanasuzumye aho ubufatanye bugeze mu guteza imbere ibikorwaremezo, gukurura ishoramari, guteza imbere uburezi ndetse no kurengera ibidukikije.

Perezida Kagame yashimiye Ambasaderi Belén Calvo Uyarra ku ruhare yagize mu gukomeza guteza imbere umubano hagati y'u Rwanda n'Umuryango w'Ubumwe bw'u Burayi mu gihe cya manda ye.

Na we yashimye uburyo yakoranye neza n'inzego zitandukanye z'u Rwanda, agaragaza ko igihugu cyageze ku ntambwe ishimishije mu iterambere no mu bufatanye n'abafatanyabikorwa mpuzamahanga.

Umuryango w'Ubumwe bw'u Burayi ukomeje kuba umwe mu bafatanyabikorwa bakomeye b'u Rwanda mu nzego zitandukanye zirimo ubucuruzi, ubuzima, uburezi, ikoranabuhanga, ibikorwa remezo no kurengera ibidukikije.

Abasesenguzi bavuga ko ibiganiro byahuje Perezida Kagame na Ambasaderi Belén Calvo Uyarra byongeye kugaragaza ubushake bw'impande zombi bwo gukomeza gushimangira uwo mubano no guteza imbere imishinga ifitiye akamaro abaturage b'u Rwanda ndetse n'Umuryango w'Ubumwe bw'u Burayi.

Manda ya Belén Calvo Uyarra isojwe isize impande zombi zishimangira ko ubufatanye bw'u Rwanda na EU buzakomeza gushingira ku nyungu rusange, ubufatanye burambye no guteza imbere iterambere rirambye mu nzego zitandukanye.

 

Like This Post?

• Share On:

Related Posts

---