Yanditswe na: NSENGIYUMVA J Damascene
27/07/2026 18:07
Guverinoma ya Iran yongeye gukarishya imvugo ku buyobozi bwa Ukraine, ishinja Perezida Volodymyr Zelensky ibikorwa bishobora guteza umutekano muke ku rwego mpuzamahanga, inemeza ko kuri ubu nta biganiro biri kuba hagati yayo na Leta Zunze Ubumwe za Amerika.
Umuvugizi wa Minisiteri y’Ububanyi n’Amahanga ya Iran, Esmaeil Baqaei, yavuze kuri uyu wa Mbere ko ibihugu bishyigikiye Ukraine bikwiye kubuza Perezida Zelensky gukomeza ibyo yise "imyitwarire iteje akaga."
Baqaei yagereranyije ibikorwa bya Ukraine n'iby'abarwanashyaka b'aba-anarchistes babayeho mbere gato y'Intambara ya Mbere y'Isi Yose, avuga ko "ibikorwa nk'ibi bishobora kugira ingaruka zikomeye zirenze akarere."
Aya magambo aje nyuma y'uko Iran ishinje Ukraine kugaba igitero ku bwato bw'ubucuruzi bwa Iran bwari mu Nyanja ya Caspian, igikorwa cyahitanye umusare umwe, undi arakomereka.
Ukraine yo yavuze ko icyo gitero cyagabwe ku bwato yavugaga ko bwari butwaye ibikoresho bya gisirikare hagati ya Iran n'u Burusiya mu rwego rwo kunyuranya n'ibihano mpuzamahanga.
Perezida wa Ukraine, Volodymyr Zelensky, yavuze ko icyo gikorwa "cyagenze neza cyane", ariko ntiyigeze atangaza ubwato bwagabweho igitero cyangwa ngo asubize ku birego bya Iran ivuga ko bwari ubw'ubucuruzi busanzwe.
Baqaei yavuze ko Iran itari mu ntambara ihanganishije u Burusiya na Ukraine, ariko ashimangira ko ibikorwa bya Kyiv byibasiye Iran binyuranyije n'amategeko mpuzamahanga ndetse n'Amasezerano y'Umuryango w'Abibumbye, yongeraho ko "bitazigera bisigara nta gisubizo."
Yongeye kuvuga ko inama Perezida Zelensky yagiranye na Minisitiri w'Intebe wa Israel, Benjamin Netanyahu, ndetse na Donald Trump, zigize icyo yise "inyabutatu y'ikibi."
Ku bijyanye n'umubano wa Iran na Amerika, Baqaei yavuze ko kuri ubu nta biganiro biri kuba hagati y'impande zombi, nubwo mbere zari zaragiranye ibiganiro byari bigamije gushaka umuti w'amakimbirane.
Yanashinje Bulgaria gufasha Amerika mu bikorwa bya gisirikare byo kurwanya Iran, nyuma y'uko Inteko Ishinga Amategeko y'icyo gihugu yemeye kwakira indege za gisirikare za Amerika n'abasirikare bayo mu rwego rwo gushyigikira ibikorwa byo mu Burasirazuba bwo Hagati.
Umuvugizi wa Iran kandi yanenze Guverinoma nshya y'u Bwongereza, ayishinja gukomeza politiki ya guverinoma yabanje yemera ko Amerika ikoresha ibirindiro bya gisirikare byo mu Bwongereza mu bikorwa byo kurwanya Iran.
Iran yanasabye u Bufaransa gusaba imbabazi, ibushinja kwivanga mu bibazo byayo by'imbere mu gihugu mu buryo bunyuranyije n'Amasezerano ya Vienna yo mu 1961 agenga umubano wa dipolomasi.
Umwuka mubi hagati ya Washington na Tehran wakomeje kwiyongera nyuma y'ibitero Amerika yagabye ku bikorwa remezo byo muri Iran mu byumweru bishize, Iran na yo igasubiza igaba ibitero ku birindiro bya gisirikare bya Amerika biri mu karere.
Nubwo ku wa 17 Kamena 2026 impande zombi zari zasinye inyandiko yemeranyijweho yo guhagarika imirwano no gutangiza ibiganiro by'amahoro byari kubera mu Busuwisi, Iran na Amerika ubu bikomeje gushinjanya kutubahiriza ibyo byari byemeranyijweho.
