Yanditswe na: NSANZABERA Jean Paul
27/07/2026 18:11
Minisitiri
w'Ububanyi n'Amahanga wa Repubulika Iharanira Demokarasi ya Congo (RDC), Thérèse
Kayikwamba Wagner, ari mu ruzinduko muri Jerusalem, rugamije kurushaho
gushimangira umubano hagati ya RDC na Israel.
Nyuma yo
kugera muri Israël ku Cyumweru, Thérèse Kayikwamba Wagner yagiranye ibiganiro
na mugenzi we w'uwo gihugu, byasojwe no gusinya amasezerano y'ubufatanye hagati
y'ibihugu byombi.
Mu ijambo
rye, Minisitiri Kayikwamba yavuze ko RDC na Israël bifite amahirwe menshi yo
gukorana mu nzego zitandukanye.
Yagize ati: "Ibihugu
byacu byombi bifite ubushobozi bwinshi bwo guteza imbere ubufatanye. Twiyemeje
kurushaho gushimangira imikoranire mu ishoramari, guhanga udushya, ubuhinzi,
ubuzima, uburezi, amahugurwa y'abadipolomate ndetse n'ikoranabuhanga rigezweho,
byose bigamije guteza imbere imibereho myiza n'iterambere ry'abaturage
bacu."
Ku ruhande
rwa Israël, Minisitiri w'Ububanyi n'Amahanga yashimangiye ko aya masezerano
azafasha kongera ubufatanye hagati y'ibihugu byombi.
Yagize ati: "Uyu
munsi turushijeho gukomeza umubano wacu binyuze mu masezerano abiri twashyizeho
umukono, arebana n'amahugurwa y'abadipolomate ndetse n'ibiganiro bya politiki
hagati ya za minisiteri zacu. Aya masezerano azatuma turushaho kwegerana kandi
afungure amahirwe mashya y'ubufatanye."
Amasezerano
yasinywe arimo ayo guteza imbere amahugurwa y'abakora muri dipolomasi no
gukomeza ibiganiro bya politiki hagati ya Minisiteri z'Ububanyi n'Amahanga
z'ibihugu byombi.
Uru
ruzinduko rwa Minisitiri Thérèse Kayikwamba Wagner ruzarangira ku wa 29
Nyakanga, rukaba rugamije kurushaho guteza imbere umubano wa dipolomasi
n'ubufatanye hagati ya RDC na Israël mu nzego zitandukanye z'iterambere.
Like This Post? Related Posts
