Yanditswe na: NDAYISENGA Clement
07/08/2026 07:24
Inteko Ishinga Amategeko ya Uganda yemeje ubusabe bwa leta bwo kohereza ingabo z'icyo gihugu muri Gaza, mu rwego rwo kwifatanya n'igikorwa mpuzamahanga kigamije gufasha kugarura amahoro n'umutekano muri ako gace kamaze igihe karangwamo intambara.
Ubu busabe bwashyikirijwe Inteko na Minisitiri w'Ingabo wa Uganda, Kiryowa Kiwanuka, wavuze ko Ingabo za Uganda (UPDF) zifite uburambe n'ubushobozi bwo kwitabira ibikorwa byo kubungabunga amahoro ku rwego mpuzamahanga, bityo zikaba zashobora gutanga umusanzu ufatika muri Gaza.
Iki cyemezo gikurikiye ubutumire bwatanzwe na Leta Zunze Ubumwe za Amerika muri gahunda ishyigikiwe na Perezida Donald Trump yiswe Board of Peace, igamije gushyiraho umutwe mpuzamahanga uzafasha mu gucunga umutekano, kurinda abasivili no gushyigikira ibikorwa by'ubutabazi muri Gaza.
Mu kwezi kwa Nyakanga 2026, ikinyamakuru cya leta ya Uganda New Vision cyatangaje ko Perezida Donald Trump yasabye Perezida Yoweri Kaguta Museveni gutanga ubufasha bwa gisirikare muri iyo gahunda.
Icyo gihe, amakuru yatangajwe n'abayobozi bo mu ngabo za Uganda yavugaga ko Uganda iri mu bihugu byatekerezwagaho kubera ubunararibonye bwayo mu butumwa bwo kubungabunga amahoro.
Uganda ni kimwe mu bihugu bya Afurika bifite amateka akomeye mu kohereza ingabo mu butumwa mpuzamahanga. Ingabo zayo zimaze imyaka myinshi zikorera ubutumwa bw'amahoro n'umutekano mu bihugu birimo Somaliya, Sudani y'Epfo, Repubulika Iharanira Demokarasi ya Congo ndetse no muri Repubulika ya Centrafrique. Uburambe bwazo ni bwo bwatumye zikomeza kugirirwa icyizere mu bikorwa mpuzamahanga.
Nubwo Inteko Ishinga Amategeko yamaze kwemeza ubu busabe, igihe nyacyo ingabo za Uganda zizatangirira ubutumwa muri Gaza, umubare w'abasirikare bazoherezwayo n'imiterere y'ubutumwa bwabo biracyategerejweho gutangazwa ku mugaragaro.
Gaza yakomeje kuba imwe mu duce twugarijwe n'ibibazo bikomeye by'umutekano n'ibikorwa by'ubutabazi, aho intambara yahitanye abantu benshi ikanateza ikibazo gikomeye cy'abimuwe n'inzara.
Imiryango mpuzamahanga ikomeje gusaba ko habaho ingamba zihamye zo kurinda abasivili no korohereza itangwa ry'ubufasha bw'ibanze.
Icyemezo cya Uganda gishobora gutuma iba imwe mu bihugu bya mbere bya Afurika byagaragaje ku mugaragaro ubushake bwo kwitabira ubutumwa bw'umutekano muri Gaza, mu gihe ibiganiro ku ishyirwaho ry'izo ngabo mpuzamahanga bikomeje hagati y'ibihugu n'imiryango mpuzamahanga.
Like This Post? Related Posts
