Yanditswe na: NDAYISENGA Clement
16/08/2026 21:37
Perezida wa Leta Zunze Ubumwe za Amerika, Donald Trump, yavuze ko ashobora gutangaza ko umuhora wa Hormuz (Strait of Hormuz) uba agace ka Leta Zunze Ubumwe za Amerika, nyuma y’uko intambara hagati ya Amerika na Iran izaba irangiye.
Trump yabivuze ku wa Gatanu, tariki ya 14 Kanama 2026, ubwo yavugiraga mu gikorwa cyabereye i Garden City, muri Leta ya New York. Yavuze ko nyuma yo “gutsinda Iran”, azatangaza bidatinze ko umuhora wa Hormuz uba ubutaka bwa Amerika.
Trump kandi yavuze ko Amerika ubu ifite ububasha bukomeye kuri uwo muhora, ndetse ko nta bwato bushobora kuwucamo keretse Amerika ibwemereye. Ibi bijyanye n’uko Amerika yashyizeho igipimo cyo guhagarika amato ajya cyangwa ava ku byambu bya Iran, mu gihe umutekano w’uwo muhora wakomeje kuzamba.
Kuki umuhora wa Hormuz ari ingenzi?
Umuhora wa Hormuz ni agace k’amazi gahambaye cyane ku bukungu bw’Isi. Uhuza Ikigobe cya Peresi n’Inyanja ya Oman, kandi ni imwe mu nzira z’ingenzi cyane zinyuramo amato atwaye peteroli na gaze biva mu bihugu bikungahaye ku mbaraga z’ibikomoka kuri peteroli byo mu Burasirazuba bwo Hagati.
Kuba umutekano w’iyi nzira warahungabanye byatumye urujya n’uruza rw’amato rugabanuka cyane, bitera impungenge ko ibiciro bya peteroli n’ibikomoka kuri yo bishobora gukomeza kuzamuka ku masoko mpuzamahanga.
Reuters yatangaje ko ku wa 14 Kanama 2026, urujya n’uruza rw’amato muri Hormuz rwari hafi guhagarara burundu nyuma y’ibitero byibasiye amato abiri.
Iran yahise yamagana amagambo ya Trump
Kazem Gharibabadi, Minisitiri w’Ububanyi n’Amahanga wungirije wa Iran ushinzwe amategeko n’imibanire mpuzamahanga, yavuze ko umuhora ya Hormuz udashobora kwigarurirwa n’inyandiko yashyizwe ku mbuga nkoranyambaga, ubwato bw’intambara, itegeko rya Perezida cyangwa ijambo ryo mu kwiyamamaza.
Abayobozi ba Iran bakomeje kuvuga ko Tehran ari yo ifite ijambo ku bijyanye no gufungura cyangwa gufunga iyo nzira, mu gihe Amerika yo ivuga ko ifite ubushobozi bwo kugenzura urujya n’uruza rw’amato.
Ese koko Hormuz izaba ubutaka bwa Amerika?
Kugeza ubu, nta cyemezo cya Leta Zunze Ubumwe za Amerika cyashyizwe ahagaragara cyemeza ko Inzira ya Hormuz yabaye cyangwa igiye kuba agace k’igihugu cya Amerika.
Byongeye kandi, ku wa 15 Kanama 2026, amakuru yaturutse muri White House yavugaga ko umuyobozi mukuru muri White House yavuze ko Trump yari ari gutebya igihe yatangazaga ko azagira Hormuz agace ka Amerika, kandi ko atari yaraganiriye n’abajyanama be kuri gahunda nk’iyo.
Ibi bituma amagambo ya Trump afatwa nk’iterabwoba rya politiki cyangwa imvugo ikaze mu gihe cy’intambara, aho kuba icyemezo cyamaze gufatwa n’ubutegetsi bwa Amerika.
Nubwo bimeze bityo, ikibazo cya Hormuz gikomeje kuba kimwe mu bibazo bikomeye cyane biri kugira ingaruka ku mutekano w’Uburasirazuba bwo Hagati, ubwikorezi bwo mu nyanja ndetse n’ibiciro by’ingufu ku Isi.
Like This Post? Related Posts
