• Dr. Sagi Assa wo muri israel yabaze umutima uruhinja bwa mbere mu Rwanda

Dr. Sagi Assa, uyobora ishami rishinzwe kuvura indwara z’umutima ku bana hakoreshejwe utwuma twinjizwa mu mitsimuri Wolfson Medical Center muri Israel, yaje mu Rwanda nyuma yo gutabazwa na mugenzi we w’Umunyarwanda, Dr. Gerard Misago. Uyu ni we muganga wa mbere w’Umunyarwanda wabonye amahugurwa yihariye mu kuvura indwara z’umutima ku bana hakoreshejwe ubu buryo.

Uruhinja rwavuwe rwitwa Angel, rwari rufite iminsi 11 gusa kandi rufite ibiro 2,6 kg. Rwavukanye ikibazo gikomeye cyo kuziba kw’imijyana yo k’umutima cyo nka critical pulmonary valve stenosis, aho umuyoboro wa valve usohora amaraso ajya mu bihaha uba warafunganye cyane, bigatuma amaraso atagera mu bihaha uko bikwiye.

Ababyeyi ba Angel bari batuye mu cyaro, bamujyanye mu bitaro bitandukanye mbere y’uko agezwa ku bitaro bya King Faisal Hospital i Kigali, aho abaganga basanze ubuzima bwe buri mu kaga gakomeye kandi hakenewe igikorwa cyihutirwa.

Dr. Sagi Assa yahagurutse muri Israel mu gicuku, anyura Addis Ababa, agera i Kigali mu gitondoakoze urugendo rwa kilometer 400 kugira ngo afashe Dr. Gerard Misago muri iki gikorwa cyari gifite ibyago byinshi. Yavuze ko kuba ari ubwa mbere ubu buryo bukorerwa uruhinja rukiri ruto cyane mu Rwanda byatumye bumva ko bagomba kubukorera hamwe.

Abaganga bakoze balloon pulmonary valvuloplasty, aho bakoresha umuyoboro muto cyane (catheter) banyuza mu mitsi kugeza ku mutima, hanyuma bakoresheje ballon bagafungura umuyoboro wa pulmonary valve wari warafunganye. Ibi byakozwe batabanje gusatura igituza no gukora open-heart surgery.

Igikorwa cyagenze neza. Mu masaha make nyuma yacyo, Angel yari amaze gutekana, ahagarikwa ku mashini yamufashaga guhumeka, ndetse asubizwa kwa nyina kugira ngo amwonse.

Igikorwa cyabaye igisobanuro gikomeye ku buvuzi bw’u Rwanda kuko cyerekanye ko abaganga b’Abanyarwanda bashobora gukora ibikorwa bikomeye byo kuvura umutima w’abana mu gihugu, aho kujya kohereza abarwayi mu mahanga. Dr. Misago ni we wayoboye igikorwa, Dr. Assa amufasha, naho Dr. Christine Niyibogora, inzobere mu gutera ikinya abana bafite indwara z’umutima, na we agira uruhare rukomeye.

Dr. Assa yari amaze imyaka itatu atoza Dr. Misago muri Israel binyuze muri gahunda ya Save a Child’s Heart, igamije kuvura abana bafite indwara z’umutima no guhugura abaganga bo mu bihugu bikiri kubaka ubushobozi bw’ubuvuzi bw’umutima.

Iyi ntambwe ifatwa nk’ingenzi cyane ku Rwanda, kuko ishobora gutuma abana benshi bavukana indwara z’umutima babona ubuvuzi bukomeye hano mu Rwanda, hafi y’imiryango yabo, aho koherezwa mu mahanga.

 

Like This Post?

• Share On:

Related Posts

---