Yanditswe na: NDAYISENGA Clement
01/09/2026 18:37
Abakozi bakorera ku bibuga by’indege muri Kenya bahagaritse imyigaragambyo yari imaze iminsi ibiri ihungabanya ingendo z’indege, cyane cyane ku Kibuga cy’Indege Mpuzamahanga cya Jomo Kenyatta (JKIA) i Nairobi ndetse no ku bindi bibuga byo hirya no hino mu gihugu.
Kuri uyu wa Kabiri, ihuriro ry’abakozi bo mu rwego rw’ubwikorezi bwo mu kirere ryagiranye amasezerano na Leta ya Kenya, ryemeza ko imyigaragambyo ihagaritswe kandi ko abakozi bahita basubira ku kazi.
Kwamamaza imyigaragambyo byari byaraturutse ku bibazo by’imishahara, imibereho y’abakozi ndetse n’amasezerano bari baragiranye n’ubuyobozi bavuga ko atari yarashyizwe mu bikorwa.
Kuva ku Cyumweru, imyigaragambyo yari yahungabanyije bikomeye serivisi z’ingendo zo mu kirere, aho abagenzi babarirwa mu magana bari baragumye ku Kibuga cy’Indege cya JKIA, kimwe mu bibuga bikomeye mu karere ka Afurika y’Iburasirazuba.
Nyuma y’ibiganiro byahuje Leta n’abahagarariye abakozi, impande zombi zumvikanye ku buryo ibibazo byari byateye imyigaragambyo bizakemurwa.
Umuyobozi w’ihuriro ry’abakozi, Moss Ndiema, yatangaje ko bahisemo guhagarika imyigaragambyo, anasaba abakozi guhita batangira gusubiza ibikorwa ku murongo.
Yagize ati: “Duhagaritse imyigaragambyo kandi turasaba abanyamuryango bacu gusubiza ibikorwa mu buryo bwari busanzwe no kongera gutanga serivisi.”
Yakomeje asaba abari ku kazi guhita batangira kwakira no kohereza indege zari zarahagaritswe.
Minisitiri w’Ubwikorezi muri Kenya, Davis Chirchir, yavuze ko Leta n’abakozi bumvikanye ku nzira yo gukemura ibibazo byari byatumye batangira imyigaragambyo.
Yavuze ko bibabaje kuba imyigaragambyo yarageze ku rwego rwo guhungabanya ingendo z’indege n’ubukungu bw’igihugu, ariko yemeza ko ikibazo cyari kiyiteye cyamaze gushakirwa umuti.
Ibi bisobanuye ko serivisi z’ingendo zo mu kirere zari zarahungabanye zikomeje gusubira ku murongo, nyuma y’iminsi ibiri y’imyigaragambyo yari yagize ingaruka ku bagenzi n’ibikorwa by’ubwikorezi muri Kenya.
Like This Post? Related Posts
