• BUKAVU: Abanyeshuri 26 baguye mu nkongi y’umuriro bashyinguwe

Abanyeshuri 26, barimo abakobwa 20 n’abahungu batandatu, bishwe n’inkongi y’umuriro i Bukavu muri Repubulika Iharanira Demokarasi ya Congo, bashyinguwe ku wa Gatandatu mu muhango waranzwe n’agahinda gakomeye.

Aba bana bapfuye ku wa Kane nyuma y’uko inkongi y’umuriro yadutse mu gihe bari mu ishuri, igatera ubwoba n’akajagari byakurikiwe no kugwirirana kw’abanyeshuri bashakaga gutoroka.

Amakuru ya UNICEF avuga ko abandi bana 25 bakomeretse muri iyo mpanuka. Raporo y’abagenzuzi ba Minisiteri y’Uburezi muri RDC igaragaza ko bamwe mu bana bapfuye bakandagiranwa nyuma yo kugwa hasi, mu gihe abandi bishwe no kubura umwuka ubwo bari bafungiranye mu nyubako.

Kugeza ubu, impamvu yatumye umuriro ufata ntiramenyekana. Abagenzuzi bagaragaje ko umuriro watangiriye ahantu hatatu hatandukanye, aho buri hantu hari hatandukanyijwe n’intera igera kuri metero 500.

Abategetsi i Kinshasa ndetse n’umutwe wa M23 ugenzura Bukavu kuva muri Gashyantare 2025, batangaje ko hatangijwe iperereza kugira ngo hamenyekane icyateye iyi nkongi.

Nyuma y’iyi mpanuka, M23 yatangaje iminsi itatu y’icyunamo ku rwego rw’igihugu, mu gihe abaturage benshi ba RDC bagaragaje agahinda gakomeye.

Usibye abantu 26 bahasize ubuzima n’abandi 25 bakomeretse, iyo nkongi yibasiye igice kinini cy’umujyi wa Bukavu gituwe cyane, irimbura amazu amagana.

Abaturage benshi basigaye badafite aho kuba, mu gihe inzego z’ibanze zatangiye gushakisha uburyo bwo kubafasha.

Bukavu, umujyi uherereye ku nkengero z’ikiyaga cya Kivu, usanzwe uzwiho guhura n’inkongi z’umuriro zikomeye. Ubucucike bw’amazu, ubushobozi buke bwo kuzimya umuriro ndetse n’imiyoboro y’amashanyarazi itemewe, ni bimwe mu bikunze kuvugwa nk’impamvu zituma umuriro ukwira vuba.

Mu Ukwakira 2025, indi nkongi i Bukavu yahitanye abantu 14, barimo abana 12.

Umuganga w’Umunyekongo akaba n’uwahawe Nobel Peace Prize, Denis Mukwege, yasabye ko habaho ubufasha bwihutirwa ku baturage ba Bukavu. Yavuze ko ibyago bikomeje kuba mu duce tugenzurwa na M23 bidakwiye kurangirira ku magambo yo kwihanganisha imiryango gusa, ahubwo ko hakenewe ingamba zifatika zo gufasha abaturage.

 

                                                                      

 

 

Like This Post?

• Share On:

Related Posts

---