• Eric Omondi yihanganishie umubyeyi wapfushije abana bane muri batanu yari yabyaye

Umuhanzi akaba n’umunyarwenya wo muri Kenya, Eric Omondi, yagaragaje ko yifatanyije n’umubyeyi wabuze abana bane muri batanu yabyaye icyarimwe, nyuma y’uko inkuru y’uyu muryango ikomeje gukora ku mitima ya benshi.

Uyu mubyeyi wo mu gace ka Juja, mu Ntara ya Kiambu, yari amaze iminsi mike abyaye abana batanu icyarimwe, ariko ibyishimo by’umuryango bihinduka agahinda nyuma y’uko abana bane bapfuye, hasigara umwe ukomeje kwitabwaho n’abaganga.

Amakuru avuga ko uyu mubyeyi yari yabyaye abana bane b’abakobwa n’umuhungu umwe, ibintu byari byateje ibyishimo bikomeye mu muryango no mu baturanyi.

Abo bana bavukiye ku bitaro bya Thika Level Five Hospital, ariko kubera ko bari bato cyane kandi baravutse batagejej  igihe , byabaye ngombwa ko bajyanwa mu bitaro bifite ubushobozi bwihariye bwo kuvura abana bavutse muri icyo gihe.

Bagejejwe ku bitaro bya Kenyatta National Hospital (KNH), aho abaganga batangiye kubitaho mu buryo bwihariye.

Icyakora, ubuzima bwabo bwakomeje kuba bubi. Abana bane bapfuye mu gihe gito, mu gihe umwana umwe w’umuhungu ari we wakomeje kubaho, abaganga bakomeza kumwitaho.

Amakuru y’ibitaro yagaragaje ko kuba abana bari bavutse ku gihe gito cyo gutwita byagize uruhare mu bibazo by’ubuzima bahuye na byo, cyane cyane ibijyanye n’imikorere y’ibihaha.

Eric Omondi, usanzwe azwiho ibikorwa byo gufasha abantu bafite ibibazo bitandukanye, yamenye iby’uyu muryango maze ahitamo kuwugeraho no kuwufasha.

Yavuganye n’abagize umuryango w’uyu mubyeyi ndetse anagaragaza ko atewe agahinda no kuba umuryango wari umaze kubona ibyishimo byo kwakira abana batanu, ariko ukaza kubura bane.

Omondi kandi yasabye ko uyu muryango uhabwa ubufasha bukenewe, haba mu bijyanye n’ubuvuzi, imihango yo gusezera ku bana bapfuye ndetse n’ibindi bibazo ushobora guhura na byo muri ibi bihe.

Nyuma y’urupfu rw’abana bane, bamwe mu bagize umuryango bagaragaje impungenge ku buryo abo bana bimuwe ku bitaro bya Thika bajyanwa i Nairobi.

Bifuza ko ibisobanuro birambuye byatangwa ku byabaye mu gihe cyo kubimura no mu masaha yakurikiyeho.

Icyakora, kugeza ubu nta cyemezo cya nyuma cyashyizwe ahagaragara kivuga ko hari ikosa ryakozwe mu buryo abana bimuwemo cyangwa mu buvuzi bahawe.

Usibye agahinda ko kubura abana bane icyarimwe, uyu mubyeyi na we yari akeneye kwitabwaho nyuma yo kubyara.

Amakuru avuga ko yari afite ibibazo by’ubuzima birimo ububabare ndetse n’ikibazo ku kuguru, ibintu byatumye ubuzima bwe burushaho kuba ingorabahizi.

Ku ruhande rw’abaganga, umwana umwe wasigaye yakomeje guhabwa ubuvuzi bwihariye kubera ko na we yavutse imburagihe.

Ibyabaye kuri uyu muryango byongeye gutuma hibandwa ku bibazo abana bavuka imburagihe bahura na byo.

Abana bavuka mbere y’uko ibice by’umubiri wabo bikura neza bashobora gukenera imashini n’ubundi buvuzi bwihariye kugira ngo babashe kubaho.

Ibi bituma ibitaro bifite ibikoresho bihagije n’abaganga b’inzobere bigira uruhare rukomeye mu kubungabunga ubuzima bw’abo bana.

Kubyara abana batanu icyarimwe byari byatangiye nk’amakuru y’ibyishimo kuri Mercy Kanini n’umuryango we.

Ariko mu minsi mike gusa, ibyishimo byahindutse agahinda gakomeye nyuma yo kubura abana bane.

Kuri ubu, umuryango ukomeje kwihanganira iki gihombo, mu gihe umwana umwe w’umuhungu akomeje guhabwa ubuvuzi.

Eric Omondi na we yakomeje kugaragaza ko yiteguye gufasha uyu muryango no gukangurira abandi kugira uruhare mu kuwufasha muri ibi bihe bikomeye.

 

Like This Post?

• Share On:

Related Posts

---