• Abaturage bo ku kirwa cya Nkombo bashyikirijwe ubwato bahawe na Perezida Kagame

Abaturage bo mu Murenge wa Nkombo, mu Karere ka Rusizi, bashyikirijwe ubwato bushya bagenewe n’Umukuru w’Igihugu, Perezida Paul Kagame, bugamije korohereza ingendo zabo n’ubwikorezi hagati y’iki kirwa n’ahandi.

Ubu bwato bwashyikirijwe abaturage na Visi Meya Alfred Habimana hamwe n’abahagarariye RTDA, mu gikorwa kigamije guteza imbere ubwikorezi bwo mu mazi no korohereza abaturage bakoresha inzira y’ikiyaga.

Ubwato bushya bufite ubushobozi bwo gutwara abagenzi 51 bicaye neza, ndetse bukaba bushobora no gutwara toni eshanu z’imizigo. Ibi biteganyijwe gufasha abaturage gukora ingendo zabo mu buryo bworoshye kandi butekanye, haba mu gutwara abantu ndetse n’ibicuruzwa.

Abaturage bazajya bishyura amafaranga 1,200 ku rugendo rwo kujya no kugaruka, igiciro kigamije gutuma serivisi y’ubwikorezi bwo mu mazi ibageraho ku buryo bushoboka.

Abaturage b’i Nkombo bakunze gukenera ubwikorezi bwo mu mazi mu bikorwa bitandukanye birimo ubucuruzi, kujya ku mirimo, kwiga no kubona serivisi zitandukanye zitangirwa ku mugabane w’igihugu.

Itangwa ry’ubu bwato risobanuye ko abaturage bagiye kugira ubundi buryo bworoshye bwo gukora ingendo, mu gihe kandi ubushobozi bwo gutwara imizigo bushobora gufasha mu koroshya ubucuruzi no kugeza ibicuruzwa ku masoko.

Ni igikorwa kandi gishyira mu bikorwa umuhigo wo gukomeza guteza imbere ibikorwa remezo n’ubwikorezi bugera ku baturage batuye mu bice byihariye nk’ibirwa.

 

Like This Post?

• Share On:

Related Posts

---