Yanditswe na: NDAYISENGA Clement
20/09/2026 10:07
Aba-Houthi bo muri Yemen bavuze ko bagabye ibitero bya misile zo mu bwoko bwa ballistic na cruise, ndetse n’indege zitagira abapilote (drones), ku bice by’ingenzi byo mu murwa mukuru wa Arabie Saoudite (Riyadh), no ku bikorwa by’ikigo cya peteroli Aramco biri i Yanbu, ku nkombe y’Inyanja Itukura.
Ku wa Gatandatu, tariki ya 19 Nzeri 2026, ubuyobozi bwa Arabie Saoudite bwatangaje ko ingabo zirinda ikirere zahanuye misile ya ballistic yari yerekejwe i Riyadh. Icyakora, nta makuru yahise atangwa yemeza ko hari abantu bapfuye cyangwa abakomeretse.
Uwo munsi, hagaragaye umwotsi mwinshi w’umukara uzamuka hafi y’Ikibuga Mpuzamahanga cy’Indege cya King Khalid i Riyadh. Hari kandi amakuru avuga ko umuriro wafashe igice cy’ibigega bibikwamo ibikomoka kuri peteroli hafi y’ikibuga cy’indege, bituma ingendo z’indege zigira ihungabana by’agateganyo.
Impuruza zo kuburira abaturage ku bitero by’indege zavugiye i Riyadh, bikaba byari bibaye ku nshuro ya mbere kuva imirwano hagati ya Arabie Saoudite n’Aba-Houthi yongeye gukaza umurego muri Nyakanga 2026.
Umuvugizi w’igisirikare cy’Aba-Houthi, Yahya Saree, yavuze ko bakoreshereje hamwe misile za ballistic, misile za cruise na drones mu bitero byibasiye ibyo yise “ibigo by’ingenzi” muri Riyadh ndetse n’ibikorwa bya Aramco i Yanbu.
Saree yavuze ko ibyo bitero byari igisubizo ku bitero Arabie Saoudite yagabye ku murwa mukuru wa Yemen, Sanaa, ugenzurwa n’Aba-Houthi. Yashinjaga Arabie Saoudite kuba yaragabye ibitero byinshi ku bice bitandukanye bya Yemen mu cyumweru cyari cyabanje.
Ku rundi ruhande, urugaga rwa gisirikare ruyobowe na Arabie Saoudite rwavuze ko ubwirinzi bw’ikirere bwahagaritse ibindi bitero byari bigamije ibice bitandukanye by’igihugu, birimo Baish, Taif, Farasan na Yanbu.
Leta Zunze Ubumwe za Amerika na zo zasabye abaturage b’Abanyamerika bari mu Burasirazuba bwo Hagati gukomeza kuba maso, ziburira ko imirwano ishobora gutuma ingendo z’indege n’izindi ngendo zibangamirwa. Minisiteri y’Ububanyi n’Amahanga ya Amerika yavuze ko Abanyamerika bakwiye kongera gutekereza ku ngendo zijya cyangwa zinyura muri ako karere.
Aba-Houthi bamaze imyaka mu ntambara n’ubutegetsi bwa Yemen bwemewe ku rwego mpuzamahanga, bushyigikiwe na Arabie Saoudite. Mu mezi ya vuba, imirwano yongeye gukaza umurego, ndetse Aba-Houthi bakomeje gutangaza ibitero byibasira Arabie Saoudite.
Amakuru yatangajwe na AFP, ashingiye ku bantu bo mu nzego z’umutekano ku mpande zombi, yavuze ko imirwano yabaye ku wa Gatandatu yiciwemo abantu 48. Aba-Houthi bavuze ko abarwanyi babo 31 bishwe, mu gihe abo ku ruhande rwa leta ya Yemen bavuze ko batakaje abasirikare 17.
Umuryango Mpuzamahanga ushinzwe Abimukira (IOM), watangaje ku wa Gatanu ko abantu 104,796 bamaze kuva mu byabo imbere muri Yemen kubera imirwano yo mu gihe cya vuba. Ibi bigaragaza ko umutekano muke ukomeje kugira ingaruka zikomeye ku baturage b’icyo gihugu.
Like This Post? Related Posts
