Yanditswe na: NSANZABERA Jean Paul
11/11/2026 19:41
Ikipe y’Igihugu y’u Rwanda, Amavubi, yatangiriye umunsi wo kuri uyu wa Gatatu, tariki ya 11 Ugushyingo 2026, mu myitozo yo kugarura imbaraga yakorewe muri ‘piscine’, mbere yo gusubira mu kibuga gukomeza imyiteguro y’umukino izahuramo na Mali.
Ni imyitozo yakozwe mu gitondo, igamije gufasha abakinnyi kuruhura imikaya no kugarura imbaraga, mu gihe iyi kipe ikomeje imyiteguro i Bamako, mu Murwa Mukuru wa Mali.
Mu mafoto yashyizwe ahagaragara n’Ishyirahamwe ry’Umupira w’Amaguru mu Rwanda (FERWAFA), abagize Amavubi bagaragara bari muri ‘piscine’, aho bakoze imyitozo yo kugarura imbaraga mbere yo gukomeza gahunda y’imyitozo isanzwe.
FERWAFA yatangaje ko nyuma y’iyi gahunda yo mu gitondo, Amavubi ateganya gusubira mu kibuga ku gicamunsi cyo kuri uyu wa Gatatu, agakora imyitozo ya mbere yo mu kibuga kuva yagera i Bamako.
Iyi myitozo yo mu kibuga izaba ari indi ntambwe mu myiteguro y’Amavubi, mu gihe abakinnyi n’abatoza bakomeje gutegura uko bazitwara mu mukino ubahuza na Mali.
Amavubi yageze i Bamako ku wa Kabiri, tariki ya 10 Ugushyingo 2026, aho yagiye gukomeza imyiteguro y’uyu mukino.
