1. Home
  2. Amakuru
  3. POLITIKI

Muhima: Hagarutswe ku bugome bw’umupadiri Munyeshyaka wasambanyaga abana n’abagore bahungiraga muri St Famille

Yanditswe na: DUSHIMIMANA Elias 2024-04-23 15:47:37 Amakuru

Ubwo abaturage barimo abatuye mu Murenge wa Muhima Akarere ka Nyarugenge, Bibukiraga Jenoside ku nshuro ya 30 ku Rwego rw'Umurenge kuri uyu wa Mbere tariki 22 Mata 2024 kuri Kiliziya St Famille, bagarutse ku ihohoterwa, iyicarubozo n'ubugome, abayihungiyemo bakorewe n’abari bizeweho ubuhungiro barimo Padiri Munyeshyaka Wenceslas.

Mu buhamya bwa Masengo Rutayisire Gilbert warokokeye kuri St Famille, avuga ko Padiri Munyeshyaka Wenceslas mu Gihe cya Jenoside yahindutse inyamaswa atangira kugabiza Abatutsi Interahamwe ndetse agasambanya abagore n'abakobwa bari bahungiye muri St Famille yari afitemo intebe y'ubuyobozi abizeza ko nibemera bakaryamana ari bubakize ntibicwe ariko siko byagendaga cyane ko hari n'abicwaga nyuma.

Masengo yabwiye itangazamakuru ko uyu mupadiri waje kwamburwa ububasha na Vaticani kandi ariyo yamutizaga umurindi ubwo Jenoside yabaga, yageze aho afatwa n'ikiniga ararira, ubwo yagarukaga ku mwana w'umukobwa witwaga Hyacènthe wari uzwi nka Miss kubera ubwiza bwe, wahozwaga ku nkeke na Padiri Munyeshyaka, amubwira ko namwemerera bagasambana ari bumufashe ntiyicwe noneho kubera uburere yahawe arabyanga cyakora nyuma agiriwe inama zo kumusanga bakaryamana kugirango abashe kurokoka abyemeye ahita abwirwa n'umujandarume ko Padiri yamutanze ngo yicwe kuko atakimukeneye , asohotse ahita araswa isasu ku zuru ahita apfa.Ati: “Munyeshyaka ni umugome kandi azabiryozwa ibyo yakoze muri Jenoside yitwaje irari ry'ubusambanyi. Yahemukiye cyane umwana witwaga Hyacènthe twitaga Miss kubera ubwiza yari afite, yamwinginze kenshi ngo baryamane ariko amubera ibamba kubera imico n'uburere yari afite. Icyo gihe yaramwangiye bitabujijwe ko abo baryamanye babayeho, nta mpamvu yo kubavuga ariko uwo mwana tariki 17 Kamena 1994, umujandarume wari uri ahangaha yamubwiye ko Padiri yamutanze ngo yicwe kuko atakimukeneye, aragenda abwira Mama we Roza ngo Padiri yantanze uyu munsi ndapfa".Padiri Munyeshyaka muri Jenoside yabaga afite imbunda ntoya ku itako

Akomeza ati" Umwana yaragiye ageze imbere ya Padiri Munyeshyaka aramubwira ngo nakwifuje kera none uyu munsi sinkushaka maze arahindukira agaruka ava kwa Padiri bahita bamurasa ku zuru ahita yikubita hasi Mama we areba, aragenda amushyira ku bibero bye, ahita amupfira ku bibero".

Muri Gicurasi umwaka wa 2023,Nibwo umushumba wa Kiliziya Gatolika ku Isi, Papa Francis, yahanishije Padiri Wenceslas Munyeshyaka, igihano cy’ikirenga cyo kumwirukana, kumuheza mu murimo w’Ubusaserdoti no kutongera gukandagira ahantu aho ari ho hose bamuzi ko yigeze kuba Umupadiri.

Impapuro zisaba itabwa muri yombi rya Munyeshyaka, zagaragazaga ko yagize uruhare mu gutegura Jenoside, akitabira inama zatumizwaga na Tharcisse Renzaho wari Perefe w’Umujyi wa Kigali hamwe na Gen Munyakazi wahamijwe uruhare muri Jenoside.

Zanagaragaza kandi uburyo Munyeshyaka hagati ya Mata na Kamena 1994 yarashe abantu bane ndetse n’ubuhamya bw’abakobwa yasambanyije ku gahato, akanagira uruhare ku bantu 60 bakuwe ahantu hatandukanye bakajya kwicirwa kuri Segiteri ya Rugenge.

Kiliziya ya St Famille iherereye mu Murenge wa Muhima, Abatutsi barenga ibihumbi 10 barahiciwe, bari baturutse mu zahoze ari Segiteri Rugenge, Muhima na Gikondo muri Komini Nyarugenge.

Related Post