08:46:32
BPlus Tv
Super Fresh
Rwanda Form
KeySoft
Matelas Dodoma
Ibyiza twagezeho ntibyatuma twirara-Perezida Kagame
Yanditswe na: DUSHIMIMANA Elias
2024-06-26 12:19:43 Amakuru
Kuri uyu wa Kabiri tariki 25 Kamena 2024, Nibwo mu karere ka Nyarugenge mu mujyi wa Kigali ahakomereje ibikorwa byo kwiyamamaza by’umuryango FPR-Inkotanyi ku munsi wa Kane, Paul Kagame watanzwe n’Umuryango FPR-Inkotanyi nk’umukandida ku mwanya wo kuyobora igihugu, yagaragaje ko u Rwanda rutagakwiye kwirara bitewe n'ibyo rwagezeho.
Ni ubutumwa Nyakubahwa Perezida Paul Kagame yatanze ubwo yagezaga ijambo ku baturage barenga ibihumbi 300 bari baje kumureba, Aho yatangiye ashimira Abanyarwanda, avuga ko barwanye urugamba rukomeye mu myaka 30 ishize dore ko u Rwanda rutari rukwiye kuba ruriho bitewe n'ibyo rwanyuzemo, rutereranwa ndetse rukanateranirwaho n'amahanga.
Ati" Rero ibyo twabyumvise kare twebwe,ndahera kuri ibyo mbashimira,mwese Abanyarugenge n'Abanyarwanda. Ibyo tunyuzemo mu myaka 30 ishize, birimo ya mateka yose batubwiye, urugamba twarwanye rwari rukomeye koko ariko uzi gutereranwa, warangiza ugateranirwaho n’amahanga.Urumva mbyombi biri hamwe?
Ubundi ntabwo uru Rwanda rwari rukwiriye kuba ruriho bitewe nuko rwatereranwe ariko binatewe nuko rwateraniweho, iteka induru igahora ari induru ku Rwanda" .
Umukuru w'Igihugu yakomeje avuga ko ubumwe bw'Abanyarwanda ari kimwe mu byabafashije mu guhindura amateka, anavuga ko nk'umukandida wa FPR-Inkotanyi ko nta cyo asaba Abanyarwanda ahubwo abashimira.
Ati" Ariko Abanyarwanda buriya bumwe ,dusubiramo twigisha buri gihe, kujya hamwe ni imbaraga,kugira intego ni imbaraga ,gukora ibyiza bikureba wumva aribyo ushaka ni imbaraga. Ibyo rero mu guhindura amateka yacu niyo nzira twahisemo.
Njyewe nubwo ndi umukandida wa FPR ndetse dufite n'abo dufatanyije,njye mu kuza hano ntacyo mbasaba ahubwo ndakibashimira.
Twarabanye, twanyuze muri byinshi hamwe tugeze kuri uyu munsi . Icyizere rero kiri hagati yanyu na FPR n'abandi bafatanyije nayo bifuza ko iki gihugu cyahora cyubaka amateka mashya y'igihe tugezemo ,y'ibyo twifuza, ibyo byose birivugira.
Ni cyo cyanzanye hano ni ukubabwira ngo dukomeze tugirirane icyo cyizere , dukomeze dufatanye ,dukorere igihugu cyacu ndetse na kwa kundi mubivuga ko ibyiza biri imbere, ni impampo ntabwo ari impuha."
Perezida Kagame yavuze kandi ko bagifite urugendo kuko bataragera aho bashaka ndetse ko ibyiza bamaze kugeraho bitabatera kwirara ahubwo bibatera imbaraga zo kubaka ngo bagere kuri byinshi bifuza imbere.
Amafoto y'abaturage baje gushyigikira Perezida Paul Kagame
Abaturage bari baturutse mu bice bitandukanye mu Mujyi wa Kigali
