Nyuma y'imyaka 17 Niyonzima Haruna yasubiye muri Rayon Sports

Ku mugoroba wo kuri uyu wa  kabiri taliki ya 16 Nyakanga 2024 , nibwo ikipe ya Rayon Sports yemeje ko Niyonzima Haruna , ari umukinnyi wayo , uyu musore wakiniraga ikipe ya Al Ta'awon yo muri Libya , yasinye umwaka umwe muri Rayon Sports, yiyongera kubandi bakinnyi iyi kipe imaze gusinyisha .

Niyonzima Haruna yatangiriye umupira mu ikipe ya Etincelles, muri 2006 yasinyiye Rayon Sports gusa nyuma y'umwaka umwe ajya muri APR FC, aba umwe mu bakinnyi bacye bavuye muri Rayon Sports, akajya muri APR FC aguzwe , muri APR FC yahagiriye ibihe byiza  muri 2011 abengukwa na Yanga Africans yo muri Tanzania, iyi kipe nayo yayimazemo imyaka 6, ajya muri mucyeba Simba yamazemo imyaka 2 agaruka mu Rwanda muri AS Kigali, uyu muri 2020 yasubiye muri Yanga Africans amarayo umwaka umwe agaruka muri AS Kigali, ari naho yavuye ajya muri Al Ta'awon.

Rayon Sports ikomeje kwitegura umwaka utaha w'imikino aho ikomeje gusinyisha abakinnyi batandukanye , iyi kipe ikaba itegereje kwemeza umutoza , Rayon Sports iratangira imikino ya gicuti kuri uyu wa gatandatu, ikina na Gorilla FC.