00:37:25
BPlus Tv
Super Fresh
Rwanda Form
KeySoft
Matelas Dodoma
Perezida wa Seychelles Ramkalawan yashimangiye ko intsinzi ya Paul Kagame igaragaza icyizere gikomeye Abanyarwanda bamufitiye
Yanditswe na: DUSHIMIMANA Elias
2024-07-21 10:34:38 Amakuru
Perezida wa Seychelles, Wavel Ramkalawan yiyongereye ku banyacyubahiro bakomeje kwishimira intsinzi ya Nyakubahwa Perezida wa Repubulika y'u Rwanda, Kagame Paul uherutse gutorwa ku mwanya w’Umukuru w’Igihugu ku majwi 99.18%, agaragaza ko bishimangira icyizere gikomeye Abanyarwanda bafitiye imiyoborere ye myiza.
Minisiteri y’Ububanyi n’Amahanga ya Seychelles yatangaje ko mu butumwa bwa Perezida Ramkalawan yavuze ko hari ikibatsi cy’iterambere kigiye kwiyongera ku byo u Rwanda rwagezeho biturutse ku miyoborere myiza ya Kagame.
Yagize ati “Mbikuye ku mutima nshimiye Perezida Kagame wongeye gutorerwa kuba Prerezida wa Repubulika y’u Rwanda. Kongera gutorwa kuri uyu mwanya ukomeye ni isezerano ry’ubuyobozi bwanyu bushishoza kandi biragaragaza icyizere Abanyarwanda bakomeje kugirira icyerekezo cyanyu mu kubaka u Rwanda ruteye imbere kandi rwunze ubumwe”.
Akomeza ati “Nizeye ko kwita ku nshingano kwanyu bizatuma u Rwanda rutera indi ntambwe mu iterambere rirambye,ubutabera kuri bose ndetse no kuzamuka k’ubukungu”.
Umubano w’u Rwanda na Seychelles watangiye mu 2010 ugenda utera intambwe aho nko mu 2013 ibihugu byombi byasinyanye amasezerano y’ubutwererane mu nzego zirimo ukerarugendo, ikoranabuhanga uburezi, ubuhinzi, ishoramari, itumanaho n’ibindi ndetse hanashyirwaho komisiyo ihuriweho yo gukurikirana ishyirwa mu bikorwa ryayo.
Mu 2018 na bwo, ibihugu byombi byasinyanye andi amasezerano mu bijyanye n’ubwikorezi bwo mu kirere nkuko Igihe kibitangaza.
Uyu mubano warushijeho gutera intambwe mu 2023 ubwo Perezida Kagame na Madamu Jeanette Kagame bagiriraga uruzinduko muri Seychelles.
Ni uruzinduko rwanasinyiwemo andi maserano y’u bifatanye mu nzego zirimo ubuzima, igisirikare n’umutekano, iyubahirizwa ry’amategeko, ubuhinzi, ubukerarugendo ndetse n’ibijyanye no gukuraho visa.
