Basketball: APR BBC yegukanye igikombe cya Shampiyona biyihesha itike ya BAL 2025

Yanditswe na: DUSHIMIMANA Elias 2024-09-23 04:14:57 Imikino

Mu ijoro ryo kuri uyu wa Gatandatu tariki 22 Nzeri 2024, Nibwo ikipe y'Ingabo z'Igihugu, APR BBC yegukanye Igikombe cya Shampiyona ya Basketball itsinze Patriots BBC amanota 73-70, biyihesha itike yo kuzahagararira u Rwanda mu mikino ya Basketball Africa League (BAL) 2025.

Wari umukino wa nyuma wa Gatandatu mu ya kamarampaka, watangiye wegeranye cyane amakipe yombi atsindana, agace ka mbere karangira Patriots BBC iyoboye umukino n’amanota 19 kuri 17 ya APR BBC.

Mu gace ka kabiri Ikipe y’Ingabo yaje yariye amavubi aho abakinnyi nka, Aliou Diarra na Axel Mpoyo batangiye batsinda amanota menshi ari nako iyobora umukino. Aka gace yagatsinze ku manota 19 kuri 14 ya Patriots BBC. Igice cya Mbere cyarangiye APR BBC iyoboye umukino n’amanota 36 kuri 33 ya Patriots BBC.

Ikipe y’Ingabo yakomeje gukina neza no mu gace ka gatatu, Ntore Habimana na Isaiah Miller barushaho gutsinda amanota menshi.

Ku rundi ruhande, Patriots ntabwo yari mu mukino neza kuko abakinnyi bayo bazwiho gutsinda amanota menshi nka Ndizeye Dieudonné byabagoye.