• Imikino / FOOTBALL

Ikipe y'Igihugu y'u Rwanda, Amavubi, yatsinzwe na Mali ibitego 2-0 mu mukino wa kane wo mu itsinda K mu mikino yo gushaka itike y'Igikombe cya Afurika cya 2027.

Uyu mukino wabereye kuri Stade Amahoro ku mugoroba wo ku wa Kabiri, tariki ya 17 Ugushyingo 2026, witabirwa na Perezida wa Repubulika, Paul Kagame.

Mali yongeye gutsinda Amavubi, nyuma y'uko no mu mukino ubanza wayibereye i Bamako yari yayatsinze ibitego 3-2. U Rwanda rwari rwizeye kwihimura imbere y'abafana barwo i Kigali, ariko ntibyashobotse.

Umutoza w'Amavubi, Stephen Constantine, yari yahisemo gukoresha abakinnyi beza yari afite. Yagaruye Mugisha Bonheur ukina hagati mu kibuga, wari warabuze umukino ubanza kubera amakarita y'umuhondo. Mugisha Gilbert na we yari yabonye umwanya mu kibuga asimbuye Kwizera Jojea, na we wari wujuje amakarita y'umuhondo.

Amavubi yatangiye umukino atagaragaza imikinire ihamye, bituma Mali iyarusha kugenzura umukino no gukora ibitero byinshi. Ibyo byaje kuyihesha igitego cya mbere hakiri kare, gitsinzwe na Modibo Segnan n'umutwe ku mupira wari utewe mu buryo bwa coup franc.

Igice cya mbere cyarangiye Amavubi ari inyuma n'igitego 1-0.

Mu gutangira igice cya kabiri, umutoza Stephen Constantine yakoze impinduka, akuramo Mugisha Gilbert wari utagize uruhare rugaragara mu mukino, ashyiramo Biramahire Abeddy.

Nyuma y'izo mpinduka, Amavubi yatangiye gukina neza, arema uburyo bwinshi bwo gutsinda ariko ntiyabasha kububyaza umusaruro. Ibitero byayo byanyuraga cyane ku ruhande rwa Elie Tatou, ndetse na Joy Lance na Leroy Jacques Mickels bagaragaza imbaraga mu busatirizi.

Mu bwugarizi, Mutsinzi Ange yagize ikibazo cy'imvune bituma asimburwa na Manzi Thierry.

Nubwo Amavubi yari amaze kongera imbaraga mu gice cya kabiri, Mali yongeye kubona igitego cya kabiri ku munota wa 88, gitsinzwe na Gaoussou Diarra, bituma amahirwe yo kwishyura ibitego yari asigaye ari make cyane.

Umukino warangiye Mali itsinze Amavubi ibitego 2-0, yongera kuyatsinda nyuma y'intsinzi yo mu mukino ubanza.

U Rwanda rugumye ku mwanya wa kabiri

Nubwo Amavubi yatsinzwe, amahirwe yo gukomeza guhatanira itike y'Igikombe cya Afurika cya 2027 aracyahari.

Ibi byashobotse nyuma y'uko Liberia itsinze Cape Verde ibitego 2-0, bituma u Rwanda ruguma ku mwanya wa kabiri mu itsinda K, inyuma ya Mali yari imaze kugira amanota 12 no kubona itike yo gukina Igikombe cya Afurika.

U Rwanda rufite amanota atandatu, mu gihe Cape Verde na Liberia zinganya amanota atatu.

Hasigaye imikino ibiri kugira ngo amatsinda arangire. Amavubi azabanza kwakira Cape Verde, mbere yo kujya gusura Liberia mu mukino uzaba ari ingenzi cyane ku mahirwe yayo yo kubona itike y'Igikombe cya Afurika cya 2027.

 








Like This Post? Related Posts
Andika igitekerezo
Recent Comments