Nyarugenge: Basabwe kwimakaza isuku n'umutekano basenyera ku mugozi umwe

Muri iyi nteko rusange yabereye mu Mudugudu w'Imibereho Myiza, mu Kagari ka Rugenge, yitabiriwe n'abayobozi batandukanye barimo abo mu nzego zibanze kugeza ku murenge n'akarere, yumvikaniyemo ubutumwa butandukanye bugamije gushakira hamwe ibisubizo by'ibibazo bishobora gusubiza inyuma iterambere ry'abaturage n'igihugu muri rusange.

Umunyamabanga Nshingwabikorwa w'Umurenge wa Muhima ariko w'Umusigire, Niyonsaba Pascal yatangiye yakira anaha ikaze abaturage bari baje ndetse n'abayobozi bari bayobowe n'Umuyobozi Nshingwabikorwa w'Akarere ka Nyarugenge, Alex Ingangare maze aboneraho gusobanura ibyo abaturage bagezeho bishakamo ibisubizo ndetse n'ibyakosotse byabangamiraga iterambere ryabo nubwo hari aho hakigaragara udusigisigi.

CIP Shadrack Munyakazi, Umuyobozi wa Polisi mu Karere ka Nyarugenge Ushinzwe guhuza abaturage na polisi, yasabye abaturage gukomeza gushyira imbaraga ku gukaza umutekano ku bufatanye n'inzego z'ubuyobozi byu mwihariko iz'umutekano kuko iyo uhari haba hari amahoro ndetse iterambere rikagerwaho mu buryo bwihuse. 

Yagize ati "Umutekano ntiwagerwaho mutabigizemo uruhare ku bufatanye n'inzego z'ubuyobozi byu mwihariko iz'umutekano bityo rero musabwa gukomeza kuwukaza kuko bizatuma iterambere ryanyu, iterambere ry'iguhugu rigerwaho kandi ryihuse mu gihe giti". 

CIP Munyakazi kandi yaboneyeho gusaba abafite utubari kuba maso bakabungabunga umutekano wabo, abakiriya ndetse n'abaturage muri rusange bitewe nuko hari iguhe usanga hari abinjiranye ibikoresho runaka birimo inkoni bishobora kuba byakwifashishwa mu guhungabanya umutekano. 

Umuturage utuye mu Mudugudu w'Impara mu Kagari ka Rugenge, yahawe ijambo maze ashimira byimazeyo Leta y'u Rwanda irangajwe imbere na Nyakubahwa Perezida, Paul Kagame wahinduye imibereho ya buri muturage yaba mu myumvire no mu bikorwa.