17:48:47
BPlus Tv
Super Fresh
Rwanda Form
KeySoft
Matelas Dodoma
U Buhinde: Abantu 36 bapfiriye mu mpanuka ya bisi
Yanditswe na: DUSHIMIMANA Elias
2024-11-05 08:31:22 Amakuru
Kuri uyu wa mbere tariki 4 Ugushyingo 2024, Nibwo abantu 36 bapfiriye mu mpanuka y’imodoka ya bisi yatewe no kubura feri ubwo yari ivuye ahitwa Garhwal yerekeza mu Mujyi w’ubukerarugendo wa Ramnagar wo mu Buhinde.
Ubuyobozi bw'akarere ka Almora habereye iyi mpanuka, bwahise butangiza ibikorwa by’ubutabazi, abagenzi bakomeretse bajyanwa mu bitaro bitandukanye byo muri ako gace.
Polisi yo muri Leta ya Uttarakhand yashyize atagaragara amashusho yerekana abashinzwe ubutabazi bari gufasha abakomerekeye muri iyo modoka yahirimye muri metero zisaga 60 uvuye ku muhanda ikagwa hafi y’umugezi.
Minisitiri ureberera Leta ya Uttarakhand, Pushkar Singh Dhami abinyujije ku mbuga nkoranyambaga, yavuze ko iperereza rihita ritangira kugira ngo hamenyekane impamvu y’iyo mpanuka.
Vineet Pal, undi muyobozi muri iyo Leta we yatangaje ko ibyavuye mu iperereza ry’ibanze, byagaragaje ko ikibazo ari uko imodoka yari ifite ibibazo, bivuze ko itaherukaga gukorerwa igenzura ry’ibinyabiziga ndetse ko ishobora no kuba yahirimye bitewe no gutwara abantu barengeje umubare wagenwe kuko yari irimo abagenzi 60 kandi yaragenewe 42.
Abantu babiri bashinzwe iby’ubwikorezi (transport), bahise bahagarikwa mu kazi kabo kubera ko bemereye iyo modoka gukomeza gukora, bakayiha uruhushya kandi babona ko imeze nabi nkuko Al Jazeera ibitangaza dukesha iyi nkuru.
Minisitiri Pushkar Singh Dhami, yatangaje ko ubuyobozi bw’iyo Leta yabayemo impanuka buzatanga impozamarira y’Amarupiya 400,000 ($4,750), ku miryango y’abaguye mu mpanuka n’Amarupiya 100.000 ($1,190) ku bakomeretse.
Minisitiri w’Intebe w’u Buhinde, Narendra Modi yohereje ubutumwa bwo kwifatanya mu kababaro n’imiryango yabuze ababo muri iyo mpanuka, nawe atangaza ko Leta izatanga indi mpozamarira y’Amarupiya 200.000 ($2,378) ku miryango yapfushije abantu, n’Amarupiya 50.000 ($594) ku bakomeretse.
U Buhinde ni Igihugu gifite imibare myinshi y’impanuka ziba buri mwaka kubera imihanda ititabwaho n’ibinyabiziga bidakorerwa igenzura uko bikwiye, aho ngo buri mwaka mu Buhinde haba impanuka zo mu muhanda 160.000.
