Muhima: Abo mu Kagari ka Kabeza bibutse banaha icyubahiro Abatutsi bishwe muri Jenoside 1994-Amafoto

Kuri iki Cyumweru tariki ya 13 Mata 2025,  Nibwo mu Mudugudu w'Ingenzi mu Kagari ka Kabeza, mu Murenge wa Muhima, Akarere ka Nyarugenge, habereye igikorwa cyo Kwibuka ku nshuro ya 31 Jenoside Yakorewe Abatutsi 1994 ku rwego rw'akagari.

Ni igikorwa cyabanjirijwe n'isengesho ryo gusengengera imigendekere myiza y'igikorwa, gusabira ku Mana Abatutsi bishwe muri Jenoside no kwihanganisha Abayirokotse bagikomeje kugira umutima ukomeye.

Umunyamabanga Nshingwabikorwa w'Umurenge wa Muhima, MUKANDORI T. Grace, yavuze ko abaturage bagomba gufata iya mbere bakaba hafi Abarokotse Jenoside, banirinda kubabwira amagambo akomeretsa arimo uguhakana no kuyipfobya Jenoside ndetse ko abagifite iyo myumvire badakwiye kwihanganirwa bagomba kurwanya binyuze mu nzira zitandukanye zirimo n'imbuga nkoranyambaga.

Umunyamabanga Nshingwabikorwa w'Umurenge wa Muhima, MUKANDORI T. Grace, yavuze ko abaturage bagomba kuba hafi Abarokotse Jenoside

Ati" Abarokotse Jenoside magingo aya barishimira ko ubuyobozi bubaba hafi, abagize  ibibazo birakemurwa, baravurwa ndetse bitabwaho mu buryo bwose ari nayo mpamvu bakwiye gukomeza gukomera badaheranwa n'agahinda. Buri muturage asabwa kubaba hafi birinda kubabwira amagambo abakomeretsa yaba muri ibi bihe byo kwibuka byo kwibuka ku Nshuro ya 31 Jenoside Yakorewe Abatutsi ndetse n'indi minsi yose, nanakomoza ku bagifite imyumvire ikocamye yo gupfobya no guhakana Jenoside, ntidukwiye kubihanganira, abayigaragayeho mubatangire amakuru ndetse mubarwanye binyuze no mu mbuga nkoranyambaga".

Perezida wa IBUKA mu Kagari ka Kabeza, Pierre Celestin NSENGIMANA, mu kiganiro kihariye yagiranye n'ikinyamakuru btnrwanda.com, Yatangaje ko yaba we cyangwa Imiryango y'Abarokotse Jenoside Yakorewe Abatutsi, cyane ubuyobozi bwa Leta y'Ubumwe burangajwe imbere na Nyakubahwa Perezida wa Repubulika y'u Rwanda, Paul KAGAME bitewe nuko Leta ibaba hafi, Aho yanavuze ko hari imiryango(abagnerwabikorwa) isaga 30 yubakiwe aho kuba gusa nanone hakaba hari indi isaga Irindwi idafite aho kwegeka umusaya bityo akaboneraho kwizeza iyo miryango ko ikibazo cyabo kizwi n'ubuyobozi kandi kizakemurwa.

Perezida wa IBUKA mu Kagari ka Kabeza, Pierre Celestin NSENGIMANA ahamya ko Abarokotse bakomeje kwiyubaka

Agira ati" Abarokotse Jenoside Yakorewe Abatutsi by'umwihariko mu Murenge wa Muhima, Turashimira cyane ubuyobozi bwa Leta y'Ubumwe burangajwe imbere n'intore izirusha intambwe, Nyakubahwa Perezida wa Repubulika, Paul KAGAME, bitewe nuko butuba hafi kandi budukorera ibishoboka byose. Hari imiryango y'Abarokotse igera kuri 30 yamaze kubakirwa aho kuba gusa ariko nanone hakaba hakiri indi isaga irindwi idafite aho kwegeka umusaya bihoraho ikeneye kubairwa, Aho iri hose ndayizeza ko ikibazo kizakemurwa kuko kizwi n'ubuyobozi, kubw'ibyo rero bizere ko bizakunda".

Perezida wa Ibuka mu Murenge wa Muhima, MBARUSHIMANA Jean Baptiste  yashimiye cyane ubuyobozi bw'ikigo cy'amashuri cya APACOPE giherereye muri uyu murenge bitewe n'uruhare kigira mu kwigisha no gusobanurira neza amateka ya Jenoside Yakorewe Abatutsi, aho yanavuze ko abahiga basobanurirwa neza Uko Jenoside yateguwe ikanashyirwa mu bikorwa n'uko yahagaritswe n'ingabo zari ziyobowe na Nyakubahwa Perezida wa Repubulika y'u Rwanda, Paul Kagame.

Yanaboneyeho kandi gushimira cyane nyakwigendera Samukiga washinze APACOPE ku mpamvu za kurwanya icunaguzwa n'itotezwa abanyeshuri b'Abatutsi bahuraga naryo mu mashuri, Aho hari igihe yahanganye n'ikibazo cy'itotezwa bakorerwaga mu bigo by'amashuri rimwe na rimwe bakinwa uburenganzira bitewe nuko bavutse.

Perezida wa Ibuka mu Murenge wa Muhima, MBARUSHIMANA Jean Baptiste  ubwo yashimiraga ikigo cy'amashuri cya APACOPE kubwo kurushaho kwigisha abakiri bato amateka ya Jenoside

Avuga ati" Turi kwibukira hano muri iki kigo cya APACOPE ku Nshuro ya 31 Jenoside Yakorewe Abatutsi 1994, iyo hatabaho nyakwigendera Samukiga wagishinze kubwo guharanira ukwishyira ukizana kw'Abatutsi bacunaguzwaga bakanatozerezwa mu bigo by'amashuri bigagamo wabona tuba turi kwibukira ahandi. Umuryango we umenye ko yaba abize aha bari ahantu hatandukanye nko mu bihugu byateye imbere ndetse n'abaturage bo muri Nyarugenge byu mwihariko Muhima, tumuha agaciro kuko yabikoze atari kubwo inyungu ze zishingiye ku mafaranga ahubwo yabikoze kubwo umutima wa kimuntu". 

Akomeza ati" Nubwo Jenoside ikiba ariwe Interahamwe zahereyeho zica kubwo kurwanya ibikorwa bye by'indashyikirwa ariko ntiyatuvuye mu mitima, intekerezo rero ibikorwa bye birivugira. Hari igihe Abatutsi batsinze ku rwego rwiza ariko baza kwimwa Dipromes zabo, icyo gihe rero nyakwigendera Samukiga yarahagurutse aramaramaza yiyemeza kwishyura ikiguzi barazihabwa, Nyagasani amutuze aheza".

Abaturage, inshuti n'abavandimwe n'abayobozi bo mu Murenge wa Muhima, ku rwego rw'Umurenge bibuka ku itariki ya 22 Mata buri mwaka.

Insanganyamatsiko yo kwibuka Jenoside Yakorewe Abatutsi mu 1994 ku nshuro ya 31 igira iti " Twibuke Twiyubaka".