Colombia: Umusenateri yarasiwe mu ruhame ubwo yiyamamazaga ku mwanya w’umukuru w’igihugu

?Ku mu goroba wo kuri uyu wa Gatandatu tariki ya 07 Kamena 2025, Nibwo Miguel Uribe Turbay, Umukandida ku mwanya wa Perezida wa Repubulika muri Colombia, yarashwe ku mutwe ubwo yari mu bikorwa byo kwiyamamariza mu Karere ka Fontibon, mu Murwa Mukuru w’icyo gihugu, Bogota.

Amakuru dukesha CNN, avuga ko mu nshuro eshatu yarashwe, amasasu abiri yamufashe ku mutwe, irindi rimufata mu ivi, bituma ajya kuvuzwa igitaraganya, aho umugore we, Maria Claudia Tarazona, yasabye abantu kumusengera ’kuko ari kurwana n’ubuzima.’

Ishyaka ry’uyu musenateri w’imyaka 39, Centro Democratico party, ryanenze iki gikorwa ndetse rivuga ko kibangamira demokarasi muri icyo gihugu, mu gihe Perezida Gustavo Petro yasezeranyije gukora iperereza ryimbitse, abari inyuma y’uyu mugambi bose bakabiryozwa.

Amatora y’Umukuru w’Igihugu muri Colombia, ateganyijwe muri 2026, aho byitezwe ko Miguel Uribe Turbay, ari umwe mu bafite amahirwe, ahanini kubera uburyo ashyigikiwe n’urubyiruko.

Kugeza ubu inzego z’umutekano zitangaza ko umwana w’imyaka 15 ukekwaho kurasa senateri yamaze gutabwa muri yombi.

Senateri Miguel Uribe Turbay yarashwe ku mutwe Imana ikinga ukuboko