• Gicumbi - Muko: Umugabo yicishije umugore we majagu

Umugabo wo mu karere ka Gicumbi mu murenge wa Muko mu kagali ka Muhinda, umudugudu wa Ntonyanga, yishe umugore we akoresheje isuka y’amenyo izwi ku izina rya majagu, abaturanyi bemeza ko uyu muryango wari usanzwe ubana mu makimbirane ndetse ko uyu mugabo yajyaga ateguza nyakwigendera ko azamwica.

Uyu mugabo witwa Hareramungu Emmanuel yabikoze mu ijoro ryo ku wa 27 Kanama 2025, Umwe mu baturage bahuye n’uyu mugabo akimara gukora aya mahano muri iryo joro yabwiye Bplus TV ko uyu mugabo yabemereye ko yishe umugore we Chantal agira ati “ Mukubise majagu kabiri, rwose yari anzengereje.”

Abaturanyi b’uyu muryango bakomeza bavuga ko amakuru y’uko uyu mugabo yishe umugore we yatanzwe bwa mbere n’umwana wabo aho ngo yasohotse mu rugo akajya guhuruza arira abamubajije ikimuriza akababwira ko se yishe nyina.

Aba bakomeza bashimangira ko uyu muryango wari usanzwe ubana mu makimbirane kuko ngo hari n’ubundi uyu mugabo yakubise umugore akanamupfuragura imisatsi agahita atoroka nyuma akaza kugaruka mu rugo bias n’ibimaze gucogora atagishakishwa n’inzego.

Bavuga kandi ko nyakwigendera nawe hari abo yari yarabwiye ko umugabo ajya amubwira ko azamwica icyakora ntihasobanurwa ishingiro ry’ayo makimbirane yatumaga uyu mugabo aho ashaka kwica umugore we.

Umvugizi wa Polisi mu ntara y’Amajyaruguru IP Ignace Ngirabakunzi yemeje aya makuru ashimangira ko ibyabaye ari ugukubita no gukomeretsa byateye urupfu. Uyu kandi yanaboneyeho gusaba abaturage muri rusange kwirinda amakimbirane yabageza ku bwicanyi ahubwo bakagana inzego mu gihe cyose hari ibyo batumvikanyeho.

Like This Post?

• Share On:

Related Posts

---