Yanditswe na: NDAYISENGA Clement
07/10/2025 08:07
Perezida Paul Biya w'imyaka 92, yananiwe kujya kwiyamamaza mu baturage maze hakorwa ikibumbano cye n'icy'umugore we maze aba ari byo rubanda rubona mu ruhame.
Mu gihe atashoboye kwitabira ibikorwa byo kwiyamamaza kubera imyaka ye n’ubuzima bitamworoyehe, abayoboke b'ishyaka rye rya CPDM bahisemo kumusimbuza ibishushanyo bye n’ibya umugore we Chantal Biya.
Ibi byateye ikibazo gikomeye muri rubanda hibazwa ukuntu ishyaka rya Cameroon People’s Democratic Movement (CPDM), ririmo gukora kampanye ku muntu utari kugaragara mu ruhame kuko kuva ibikorwa byo kwiyamamaza byatangira ntiyari yagaragara mu ruhame kandi ngo ashaka indi manda y'imyaka irindwi ayoboye igihugu cya Cameroun.
Ibikorwa byo kwiyamamaza ku mwanya wa Perezida muri iki gihugu byatangiye ku wa 27 Nzeri 2025, bikazarangira ku wa 11 Ukwakira 2025, saa Sita z'ijoro.
Amatora ya Perezida muri Cameroon ateganyijwe ku wa 12 Ukwakira 2025. Perezida Biya amaze imyaka 43 ku butegetsi kuko yabugiyeyo mu mwaka 1982, azaba ari kwiyamariza manda ya 8.
Mu mwaka wa 2008, Paul Biya yahinduye Itegeko Nshinga ry'Igihugu, akuraho itegeko rikumira Perezida kutarenza manda ebyiri ari byo byatumye yemererwa gukomeza kwiyamaza mu zindi manda.
Maurice Kamto, wabaye umukandida ukomeye ku mwanya wa Perezida, mu matora ya 2018 (yabonye amajwi 14%), yangiwe kwiyamamaza n’akanama gashinzwe amatora muri icyo gihugu (ELECAM), kandi n’Urukiko rw’Ikirenga rwarabyemeje.
Abandi biyamamaza kuri uwo mwanya barimo: Bello Bouba Maigari, Issa Tchiroma Bakary, Joshua Osih, Cabral Libii, na Akere Muna.
Abakandida ku mwanya wa Perezida muri Cameroon 13 nibo bemerewe n'akanama gashinzwe amatora muri icyo gihugu.
Mu matora ya Perezida wa Cameroun aheruka yabaye mu 2018, Paul Biya yatsinze amatora ku majwi 71.28%. Mu gihe uwo bari bahanganye muri ayo matora, Maurice Kamto, yabonye amajwi 14.23%.
Biya ni Perezida wa kabiri muri Afurika ku bamaze igihe kinini ku butegetsi inyuma ya
Perezida Teodoro Obiang Nguema Mbasogo wo muri Guinée Équatoriale, wafashe ubutegetsi mu mwaka wa 1979, ubu akaba amaze imyaka irenga 46 ari perezida w’igihugu cye.
