• Chameleone yasobanuye impamvu ashyigikiye Perezida Museveni na NRM

Umuhanzi w’icyamamare muri Uganda Jose Chameleone, uyobora inzu itunganya umuziki Leone Island, yasobanuye impamvu akomeje gushyigikira Perezida Yoweri Kaguta Museveni n’ishyaka rye NRM (National Resistance Movement), avuga ko ubudahemuka bwe kuri we buzahoraho iteka.

Mu kiganiro yagiranye n’itangazamakuru ryo muri Kampala, Chameleone yavuze ko impamvu nyamukuru ituma ashyigikira Perezida Museveni ari uko NRM ari ryo shyaka azi kuva akiri umwana, kandi ryamubereye ishuri ry’amahoro n’iterambere.

 Chameleone yakomeje  avuga “Impamvu nshyigikiye Perezida Museveni ni uko NRM ari ryo shyaka nzi kuva nkiri muto. Ni ryo ryamfashije kumva agaciro k’amahoro, ubumwe n’iterambere,”

Yongeyeho ko gushyigikira Museveni bitashingira ku nyungu ze bwite, ahubwo ari ukwemera amahoro n’ituze igihugu gifite, ndetse n’uruhare rw’ubuyobozi bwa Museveni mu guteza imbere abaturage ba Uganda.

Nubwo hari abamunenga bavuga ko akora politiki ku nyungu ze, Chameleone avuga ko ubuhanzi bwe bugamije guhuza Abanya-Uganda bose, atari ukubacamo ibice.

“Ndashaka kuba ijwi rihuza Abanya-Uganda bose, si ukubacamo ibice. Umuziki wanjye ni uw’abantu bose,”
yongeyeho.

Uyu muhanzi kandi yashimiye Perezida Museveni ku buryo yamuhaye ubufasha igihe yari arwariye muri Leta Zunze Ubumwe za Amerika.

“Perezida Museveni yambaye hafi cyane igihe nari ndi mu bihe bikomeye. Yantanzeho ubufasha bw’amafaranga ubwo nari ndwariye muri Amerika. Ibyo byanyeretse ko afite umutima w’ubumuntu,”

Chameleone yavuze ko ubudahemuka bwe kuri Perezida Museveni butazigera bushidikanywaho, kandi ko azakomeza kumushyigikira kubera ubuyobozi bwe n’uburyo yateje imbere igihugu cya Uganda.

“Ubudahemuka bwanjye kuri Perezida Museveni ntibuzahinduka. Nzahora mushyigikira kuko yateje imbere igihugu cyacu,”

Uyu muhanzi wigeze kwiyamamariza kuba Meya wa Kampala mu 2021, yavuze ko ibyo yanyuzemo byamwigishije agaciro k’amahoro, ubwiyoroshye n’ubumwe bw’igihugu, kandi ko azakomeza gukoresha umuziki we nk’uruhare mu kubaka igihugu gifite ubumwe n’amahoro arambye.

Like This Post?

• Share On:

Related Posts

---