Yanditswe na: NSANZABERA Jean Paul
22/10/2025 12:34
Mu
gihugu cya Afurika y’Epfo, abasore babiri bapfuye naho abandi batanu barakomereka nyuma
y’urusaku rw’amasasu rwabaye ku wa kabiri mu gitondo mu gace ka Westbury, mu mujyi wa Johannesburg.
Nk’uko
byatangajwe na Polisi y’Afurika y’Epfo, abo basore bari hagati y’imyaka 13 na 19, kandi bari bari kumwe ubwo abagabo bane bari bitwaje imbunda
babasagariraga, bakabarasaho amasasu menshi. Polisi ivuga ko kugeza ubu impamvu y’icyo gikorwa ikiri mu iperereza,
ariko ko bishoboka ko gifitanye isano n’amakimbirane y’imitwe y’amabandi.
Umuvugizi
wa Polisi yavuze ko abakekwaho gukora
ayo mahano bahise bahunga nyuma yo kurasa, kandi ko inzego zitandukanye
zirimo n’ishami ry’iperereza ryihariye ku byaha bikomeye (Crime Intelligence Unit) zatangiye operasiyo yo kubashakisha hirya no
hino muri Johannesburg.
Iri
shyano ryongeye kubyutsa impungenge ku kwiyongera
kw’urugomo rufitanye isano n’amabandi n’imbunda muri Afurika y’Epfo,
igihugu kimaze igihe cyibasiwe n’ubwicanyi bukabije. Imibare ya Leta igaragaza
ko muri iki gihugu hapfa abantu basaga
60 ku munsi bazize ubwicanyi.
Abaturage
bo muri Westbury basabye Leta kongera umutekano, bavuga ko urubyiruko
rutakigira amahoro mu mihanda kubera amabandi n’ibikorwa by’ubugizi bwa nabi
bikomeje kwiyongera.
