• Intumwa y'U Burayi mu Karere k’ibiyaga Bigari yatangiye uruzinduko mu Rwanda

Minisitiri w’Ububanyi n’Amahanga n’Ubutwererane, Amb Olivier Nduhungirehe ari kumwe na Minisitiri w’Ingabo Juvenal Marizamunda, bakiriye Intumwa yihariye y’Umuryango w’Ubumwe bw’Uburayi (EU) mu Karere k’Ibiyaga Bigari, Ambasaderi Johan Borgstam, watangiye uruzinduko rw’akazi rw’iminsi ine mu Rwanda.

Ni amakuru yashyizwe hanze na Minisiteri y’Ububanyi n’Amahanga kuri uyu 23 Ukwakira 2025, ibinyujije ku mbuga nkoranyambaga.

Minisiteri y’Ububanyi n’Amahanga n’Ubutwererane (MINAFFET) kandi yavuze ko abayobozi bombi baganiriye ku ntambwe imaze guterwa mu rugendo rwo kugarura amahoro mu Karere harimo n’ibiganiro by’amahoro mu Burasirazuba bwa RDC.

Johan Borgstam yaherukaga mu Rwanda muri Gashyantare uyu mwaka, icyo gihe akaba yarakiriwe n’Umunyamabanga wa Leta muri Minisiteri y’Ububanyi n’Amahanga Ushinzwe Ubutwererane bw’Akarere Gen (Rtd) Kabarebe James.

Icyo gihe u Rwanda rwamugaragarije impungenge z’umutekano rutewe n’umutwe witwaje intwaro wa FDLR udahwema kurugabaho ibitero uturutse hakurya y’imipaka, ndetse n’ingengabitekerezo ukwiza mu Burasirazuba bwa Repubulika Iharanira Demokarasi ya Congo (RDC) no mu Karere k’Ibiyaga Bigari.

Mu gihe EU yari yafashe uruhande rwo kugendera ku binyoma byatangazwaga na RDC, u Rwanda rwamenyesheje EU ko ihame ry’ubusugire bw’igihugu ridakora gusa ku bindi bihugu bitarimo u Rwanda.

U Rwanda rwasabye EU gutanga umusanzu mu rugendo rwo gushakira igisubizo kirambye ibibazo by’umutekano muke mu Karere k’Ibiyaga Bigari.

Uru ruzinduko rushya kandi rwitezweho kuganirwamo intambwe ikomeje guterwa mu biganiro by’amahoro bishyigikiwe na Leta Zunze Ubumwe za Amerika, Umuryango wa Afurika Yunze Ubumwe na Qatar, n’umusanzu w’ibihugu bihuriye muri EU kugira ngo iyo ikomeze gusigasirwa.

Ibiganiro bikomeje bigamije gushyira mu bikorwa ibikubiye mu masezerano y’amahoro yasinywe hagati y’u Rwanda na RDC, ndetse n’ayasinywe hagati ya RDC n’inyeshyamba za M23, umugambi ukaba ari uwo gukemura ibibazo haherewe ku mpamvu shingiro z’amakimbirane amaze imyaka n’imyaka.

Like This Post?

• Share On:

Related Posts

---