Rutahizamu w’Umunya-Argentine, Lionel Messi, yongereye amasezerano azatuma ageza imyaka 41 akiri umukinnyi wa Inter Miami yo muri Leta Zunze Ubumwe za Amerika.

Messi yasinye indi myaka itatu izarangira mu 2028 nk’uko byatangajwe n’Ikipe ya Inter Miam kuri uyu wa Kane.

Uyu mukinnyi yatsinze ibitego 71 mu mikino 82, atanga indi mipira 37 yavuyemo ibitego, kuva ageze muri Inter Miami mu 2023 avuye muri Paris Saint-Germain yo mu Bufaransa.

Ikipe ye yasoreje ku mwanya wa gatatu mu Gace k’Iburasirazuba, aho yatsinze imikino 19, inganya umunani mu mikino 34 yakinnye muri uyu mwaka w’imikino.

Messi yatsinze ibitego 28 anatanga imipira 16 yavuyemo ibindi bitego mu mikino 28, ndetse kuri ubu we na bagenzi be baritegura guhura na Nashville muri “play-offs”.

Ikipe ya Inter Miami itozwa na Javier Mascherano, yatsinze Nashville ibitego 5-2 mu cyumweru gishize, mu mukino usoza umwaka usanzwe w’imikino.

Muri uwo mukino, Messi yinjijemo ibitego bitatu ndetse hari amahirwe menshi ko yakongera kuba umukinnyi w’umwaka muri Major League Soccer ku nshuro ya kabiri yikurikiranya, aho yaba ari we mukinnyi wa mbere ubikoze.

Ku myaka 38, yamaze kwegukana igihembo cy’umukinnyi watsinze ibitego byinshi ndetse yafashije Inter Miami kwegukana “Supporters Shield” mu 2024.

Ubwo yageraga muri Inter Miami mu 2023, Messi wabaye ikirangirire akinira FC Barcelone, yari yasinye amasezerano y’imyaka ibiri n’igice aho kuri ubu yagaragaje ko agifite igihe cyo gukina.

Uyu mukinnyi watwaye Ballon d’Or inshuro umunani, amaze gukina imikino myinshi iruta iyo yakiniye Paris Saint-Germain ndetse ari guca uduhigo dutandukanye.

Nubwo imyaka ye imaze gukura, uyu rutahizamu aracyari mu mibare y’umutoza wa Argentine, Lionel Scaloni, aho yatsinze ibitego bibiri mu mukino wa gicuti wabahuje na Puerto Rico mu ntangiriro z’uku kwezi.

Messi ari gusatira gukina umukino wa 200 mu Ikipe y’Igihugu ya Argentine ndetse azayirenza naramuka yitabiriye Igikombe cy’Isi cya 2026.