• Amafaranga inzego z’ibanze zinjiza ku mwaka yikubye inshuro zirenga ebyiri - MINALOC

Minisiteri y’Ubutegetsi bw’Igihugu (MINALOC) yagaragaje ko amafaranga inzego z’ibanze zinjiza ku mwaka yikubye inshuro zirenga ebyiri agera kuri miliyari 100 Frw mu mwaka ushize ndetse iyo ikaba ari inkingi imwe muri nyinshi zigaragaza umusaruro mwiza wo kwegereza abaturage ubuyobozi n’ubushobozi.

Raporo ya MINALOC ku kwegereza abaturage ubuyobozi mu myaka 25 ishize, igaragaza ko imwe mu nkingi za mwamba ari uko havuguruwe inzego z’imitegekere y’Igihugu.

Mbere ya 2001 u Rwanda rwari rufite perefegitura 12, komini 154, imirenge 1,531 n’utugari 8,987.

Ibyo byatumye hakorwa amavugurura mu rwego rwo kwegereza abaturage ubuyobozi mu 2001 hashyirwaho intara 11 n’Umujyi wa Kigali, uturere 106, imirenge 1,545 n’utugari 9,165.

Ayo mavugurura na yo ntiyatanze umusaruro wari witezwe bituma mu 2006 hakorwa andi akigenderwaho uyu munsi.

Intara zaragabanyijwe ziba enye n’Umujyi wa Kigali, Uturere na two tuba 30, imirenge na yo igirwa 416 n’utugari tugirwa 2,148 hiyongeraho urwego rw’umudugudu hashingwa igera ku 14,837.

Gahunda yo kwegereza abaturage ubuyobozi n’ubushobozi mu myaka 25 yari igabanyijemo ibyiciro bitandukanye harimo icyo kuva mu 2001-2005 cyibanze ku kongera kubaka icyizere hagati y’abayobozi n’abaturage nyuma ya Jenoside yakorewe Abatutsi ndetse banabasha kwitorera abayobozi binyuze muri demokarasi.

Ni cyo cyiciro kandi cyakozwemo ivugurura rya mbere ry’inzego z’imitegekere y’Igihugu.

Ikiciro cya kabiri cyahereye mu 2006-2011 kigamije kubaka ubushobozi bwa za nzego z’ibanze ngo zikomere ndetse zongera kuvugururwa mu rwego rwo kugabanya imishahara yagendaga ku bayobozi benshi.

Ikindi cyakozwe muri icyo kiciro ni uguhuza imikorere y’inzego z’ibanze n’igenamigambi ry’Igihugu by’umwihariko ku cyerekezo 2020 u Rwanda rwari ruhanze amaso icyo gihe ndetse icyo gihe hagira imisoro yegurirwa inzego z’ibanze mu rwego rwo kuzubakira ubushobozi.

Ikiciro cya gatatu ni ukuva mu 2012-2017 cyaranzwe no gukomeza kubakira ubushobozi za nzego n’abaturage.

Hashinzwe inzego nshya, hatorwa amategeko mashya, umuturage ahabwa ijambo mu bimukorerwa ndetse hanongerwa ikoranabuhanga mu mitangire ya serivisi za Leta. Ni mu gihe ikindi cyiciro gihera mu 2018 kuzamura.

Muri izo ngamba zafashwe zatanze umusaruro wo kongera uruhare rw’umuturage mu bimukorerwa ruva kuri 66,9% mu 2015 rugera kuri 88,4% mu 2024.

Muri uwo mujyo kandi amafaranga inzego z’ibanze zikusanya yavuye kuri miliyari 49,7 Frw mu 2006 agera kuri miliyari 107,5 Frw mu 2024/25.
Ubukene na bwo bwaragabanyutse aho mu 2000 habarwaga ko abaturage bakennye bari ku ijanisha rya 58,9% ariko bageze kuri 27,4% mu 2023/24.

Amafaranga Leta iha inzego z’ibanze mu kunganira ibyo zikora na yo yazamukanye n’ubukungu bw’Igihugu ava kuri miliyari 44,4 Frw ku mwaka yariho mu 2008 agera kuri miliyari 865,6 Frw mu 2023/24.

Gukorera mu mucyo mu nzego z’ibanze kandi na byo byarazamutse aho mu turere 30 raporo zihabwa Umugenzuzi Mukuru w’Imari ya Leta ari nta makemwa dutanga zavuye kuri 0 mu 2018/19 zigera kuri 27 mu 2023/24.

Gahunda yo kwegereza abaturage ubuyobozi n’ubushobozi kandi yanatanze umusanzu mu kongera ibyo umuturage yinjiza ku mwaka aho byavuye ku 220$ mu 2000 bigera ku 140 mu 2024.

Hahanzwe kandi imirimo mishya mu nzego z’ibanze ingana na 942.324 kuva mu 2017–2021 bingana na 88% by’igera kuri 1,071,425 yari yiyemejwe.

Uko ubukungu bwazamutse kandi byatumye ibyo u Rwanda rwohereza mu mahanga byiyongera bigera ku gaciro ka miliyoni 108,3$ mu 2015 bigera kuri miliyari 159,4$ mu 2024.

Muri iyo myaka kandi ibyoherezwa mu mahanga byaragabanyutse ahanini bitewe na gahunda y’Igihugu yo kongera ibikorerwa mu Rwanda aho byavuye ku gaciro ka miliyoni 22$ bigera kuri miliyoni 9,12$ mu 2024.

Abaturage bishimira serivisi bahabwa mu nzego z’ibanze kandi na bo mu 2024 bari bageze ku ijanisha 76,5%.

Urubuga rwa Irembo rutangirwaho serivisi za Leta kuri ubu rugera ku baturage bangana na 80,73% kandi zihuta ku muvuduko wa 86,61% ndetse abaturage 71,5% bahamya ko byagabanyije ruswa yaterwaga no gusiragira mu nzego z’ibanze n’ibindi bipimo bitandukanye.

MINALOC igaragaza ko ariko hagikenewe kongerera uturere ingengo y’imari no kuhamanura zimwe muri serivisi zitangirwa ku rwego rw’Igihugu kuko ubu muri serivisi za Leta 522, izigera kuri 127 ni zo abaturage babona batarenze ku turere.

Ni mu gihe serivisi 105 zegerezwa abaturage mu gihe runaka zikongera kugaruka ku rwego rw’Igihugu naho izigera kuri 290 zo ziracyatangirwa ku rwego rw’Igihugu gusa.

 

Like This Post?

• Share On:

Related Posts

---