• Perezida Paul Biya yongeye gutorerwa kuyobora Cameroun

Perezida uri ku butegetsi Paul Biya yongeye gutorerwa kuyobora igihugu ku manda ya munani, aho yatowe ku majwi 53,66%, nk’uko byatangajwe n’Urukiko rushinzwe Itora ku wa Mbere tariki ya 27 Ukwakira.

Ibisubizo by’amatora yabaye ku wa 12 Ukwakira byatangajwe bukeye bw’aho mu gihugu habaye imyigaragambyo n’umwuka w’intugunda, nyuma y’uko Issa Tchiroma Bakary wahoze ari Minisitiri, yari yatangaje ko ari we watsinze ayo matora.

Nk’uko byatangajwe n’Urukiko rushinzwe amatora kuri uyu wa Mbere tariki ya 27 Ukwakira, Perezida uri ku butegetsi Paul Biya wo mu ishyaka RDPC yongeye gutorerwa kuyobora Cameroun indi myaka irindwi, abona amajwi 53,66% angana n’abarenga miliyoni 2,470.

Paul Biya, ufite imyaka 92 y’amavuko, amaze imyaka 43 ayobora Cameroun bityo akaba atangiye manda ye ya munani.

Issa Tchiroma Bakary, wari umukandida ukomeye utavuga rumwe n’ubutegetsi wo mu ishyaka FSNC, yari yitangaje ko ari we watsinze amatora nyuma y’itora ndetse ku Cyumweru ahamagarira abamushyigikiye gukora imyigaragambyo. Mu majwi yatangajwe, uyu mukandida yabonye 35,19% angana n’abasaga miliyoni 1,622.

Mu myigaragambyo yabaye ku Cyumweru i Douala, umujyi wa kabiri ukomeye mu Bukungu, abantu bane bapfiriyemo  nk’uko inzego za Leta zibivuga.

Tchiroma mu kiganiro yagiranye na AFP kuri uyu wa Mbere yamaganye ibisubizo by’amatora abita “imikino y’uburiganya”, avuga ko “ari bo batsinze nta gushidikanya.”

Cabral Libii yaje ku mwanya wa gatatu n’amajwi 3,41%, akurikirwa na Bello Bouba Maïgari wagize 2,45% na Hermine Patricia Tomaïno Ndam Njoya wagize 1,66%.

Mu muhango wo gutangaza ku mugaragaro ibyavuye mu matora, witabiriwe n’intumwa z’ibihugu by’i Burayi na Leta Zunze Ubumwe za Amerika, Urukiko rushinzwe amatora rwatangaje ko ubwitabire bwari 57,76%.

Imibare yatangajwe igaragaza ko Issa Tchiroma Bakary yatsinze mu ntara za Adamaoua, mu Majyaruguru no mu Ntara ya Littoral, mu gihe Perezida Paul Biya yitwaye neza cyane mu Majyepfo (hejuru ya 90%), mu Burengerazuba (86,31%) no mu Burasirazuba (73%).

 

 

Like This Post?

• Share On:

Related Posts

---