Yanditswe na: NDAYISENGA Clement
17/11/2025 17:44
Perezida Samia Suluhu Hassan wa Tanzania, yashyize umukobwa we hamwe n'umukwe we (umugabo w'umukobwa we) muri guverinoma nshya ya Tanzania, ibintu biri kugarukwaho cyane ku mbuga nkoranyambaga mu karere k'Afurika y'Iburasirazuba.
Muri iyo guverinoma yatangajwe kuri uyu wa, Mbere, tariki ya 17 Ugushyingo 2025, Wanu Hafidh umukobwa wa Samia Suluhu, yagizwe Minisitiri wungirije w'uburezi, naho umugabo we (umukwe wa Samia) Mohamed Mchegerwa, agirwa Minisitiri w'ubuzima, Mchegerwa yari asanzwe ari Minisitiri mu biro bya perezida.
Samia kandi yashyizeho Minisiteri itari isanzweho, Ministeri y'Ibireba Urubyiruko.
Ibi bibaye nyuma y'imyigaragambyo y'urubyiruko yakuriye amatora yabaye ku wa 29 Ukwakira 2025.
Abatavuga rumwe n'ubutegetsi n'imiryango itegamiye kuri leta bavuga ko igipolisi cyishe abantu babarirwa mu magana muri iyo myigaragambyo, imirambo ya benshi igahishwa.
Mu gihe Leta ya Tanzania nta mibare y'abishwe cyangwa abakomeretse yigeze itangaza.
Mu cyumweru gishize kandi Perezida Samia Suluhu Hassan, yasezeranyije iperereza ryimbitse ku mvururu zabaye nyuma y'amatora yo ku wa 29 Ukwakira 2025.
Yashyizeho kandi komisiyo yo gukora iperereza, anasaba abashinjacyaha "guca inkoni izamba [kudohora]" ku batawe muri yombi bijyanye n'urwo rugomo.
Yifashishije amagambo yo muri Bibiliya, yagize ati: "Data, ubababarire kuko batazi icyo bakora."
Nyuma yo gutangaza ibyo ariko urubyiruko rwo muri icyo gihugu rwiraye ku mbuga nkoranyambaga ruvuga ko izo mbabazi rutazemera ruti"Ntabwo turi abana bawe."
Urwo rubyiruko rwongeyeho ko ahubwo ruri gutegura ibwirwaruhame (speech) yarwo izatangarizwa kuri Perezidansi ya Tanzania ku wa Kabiri, tariki ya 09 Ukuboza 2025.
Perezida Samia yatsinze ayo matora ku majwi 98%, ibyo abatavuga rumwe n'ubutegetsi bwe bise "igisebo kuri demokarasi."
Gushyira umukobwa we n'umukwe we muri guverinoma nshya birimo kuvugwaho cyane ku mbuga nkoranyambaga mu baturage ba Tanzania no mu karere.
Ibyo wamenya kuri Wanu Hafidh Ameir, umukobwa wa Samia Suluhu Hassan, washyizwe muri Guverinoma ya Tanzania
Wanu Hafidh Ameir wavukiye muri Zanzibar mu 1982, ubu afite imyaka 43 y'amavuko, azwi cyane muri Tanzania nk'umukobwa mukuru wa Samia Suluhu na Hafidh Ameir.
Wanu yakurikiye inzira ya nyina, aba umunyapolitiki mu ishyaka CCM. Yabaye mu nama y'ubutegetsi y'iri shyaka ku rwego rw'igihugu, umwanya yarimo kuva mu 2010.
Yagiye ahabwa imirimo itandukanye ya politiki, kuva mu 2015 kugera mu 2018, yari umwe mu bagize komisiyo y'amategeko mu nteko ishinga amategeko.
Yabaye umukuru w'urubyiruko mu ishyaka CCM mu gace ko mu majyepfo y'ikirwa cya Zanzibar kuva mu 2008 kugeza mu 2012.
Wanu ni umukuru w'ikigo kitegamiye kuri leta Women's Initiative Foundation (MIF), akaba ari na we wagitangije mu 2022 muri Zanzibar agamije gufasha kwiga abana bo mu miryango itishoboye.
Kuva mu 2005, Wanu Hafidh w'imyaka 43 ni umudepite uhagarariye ikirwa cya Zanzibar wo mu ishyaka Chama Cha Mapinduzi riri ku butegetsi.
Mu matora yo mu kwezi gushize, Wanu yagaragaye yamamaza nyina ngo atorwe nka perezida, ari na ko na we yiyamamaza ngo yongere atorerwe kuba umudepite.
