• Albania: Abadepite barwanye mu Nteko kubera uko polisi yitwaye mu myigaragambyo y’abanyeshuri

Abadepite bo muri Albania bagiranye amakimbirane akomeye yanavuyemo imirwano mu Nteko Ishinga Amategeko kuri uyu wa Kane, nyuma y’uko abatavuga rumwe n’ubutegetsi basabye ibisobanuro ku buryo polisi yitwaye mu myigaragambyo y’abanyeshuri yamagana Guverinoma.

Amashusho yafashwe imbere mu Nteko i Tirana agaragaza abadepite basunikana, baterana amagambo, bajugunya impapuro ndetse bazamura amafoto y’abigaragambyaga bakomerekejwe. Abadepite batavuga rumwe n’ubutegetsi banabujije ibikorwa by’Inteko gukomeza bisanzwe, bahagarara imbere y’aho Perezida w’Inteko, Niko Peleshi, agirira imirimo ye.

Abadepite bo mu ishyaka ritavuga rumwe n’ubutegetsi rya Democratic Party basabye Minisitiri w’Umutekano w’Imbere mu Gihugu, Ervin Demo, ibisobanuro ku ngamba polisi yakoresheje mu guhangana n’abigaragambyaga.

Iyi mvururu yabaye nyuma y’iminsi myinshi y’imyigaragambyo yabereye mu murwa mukuru Tirana, aho abanyeshuri basaba kunoza ireme ry’uburezi, kongera amahirwe yo kubona akazi no gufata ingamba zo kurwanya ruswa bakeka ko iri muri Guverinoma.

Imwe muri iyo myigaragambyo yaranzwe n’urugomo, aho abigaragambyaga bangije inyubako rusange ndetse bagahangana n’abapolisi bashinzwe guhosha imyigaragambyo. Polisi yakoresheje amazi yotsa n’imyuka iryana mu maso kugira ngo itatanye abari mu mihanda.

Ku ruhande rw’ishyaka riri ku butegetsi rya Socialist Party, Taulant Balla wahoze ari Minisitiri w’Umutekano w’Imbere mu Gihugu, yasabye ko polisi ishyigikirwa, avuga ko irimo gukora inshingano zayo hakurikijwe amategeko.

Imvururu zageze no ku matora y’amategeko yari ateganyijwe mu Nteko. Nyuma y’uko habaye ikibazo mu buryo bw’ikoranabuhanga bwakoreshwaga mu gutora, Perezida w’Inteko yahisemo gukoresha amakarita y’itora kugira ngo imirimo ikomeze.

Nubwo hari umwuka mubi, Inteko yakomeje ibikorwa byayo, ndetse yemeza umushinga w’itegeko ryemeza amasezerano y’Inama y’u Burayi agamije kurengera umwuga w’abavoka. Iryo tegeko ryatowe n’abadepite 76, umwe araryanga, nta wifashe.

Imyigaragambyo y’abanyeshuri yatangiye ku wa 13 Ukwakira 2026, ikomeza gushyira igitutu kuri Guverinoma ya Minisitiri w’Intebe Edi Rama, cyane cyane ku birego bya ruswa n’uburyo inzego z’umutekano zigenza abigaragambya.

Iyi mirwano yo mu Nteko igaragaza ko impaka ku miyoborere y’igihugu n’imikorere ya polisi zikomeje gukaza umwuka wa politiki muri Albania, aho kutumvikana kwari kwatangiye mu mihanda kwageze no mu rwego rukuru rw’ubutegetsi bw’igihugu.

Like This Post?

• Share On:

Related Posts

---