Yanditswe na: NSANZABERA Jean Paul
24/11/2025 10:03
Igisirikare cya
Repubulika ya Demokarasi ya Congo (FARDC) cyemeje ko Lt. Gen. Pacifique
Masunzu, umwe mu basirikare bakomeye bo mu Banyamulenge, ari ku rutonde
rw’abofisiye bakuru bafunzwe na Tshisekedi.
Lt. Gen. Masunzu yari asanzwe ari umuyobozi wa zone ya gisirikare
ya gatatu ihuza intara za Kivu y’Amajyaruguru, Kivu y’Amajyepfo, Maniema,
Ituri, Tshopo, Bas-Uélé na Haut-Uélé.
Uyu musirikare ukomoka muri Minembwe yatawe muri yombi tariki ya 2 Ugushyingo 2025 ubwo yari i Kisangani mu Ntara ya Tshopo, yoherezwa mu Murwa Mukuru, Kinshasa.
Amakuru avuga ko akurikiranyweho ubugambanyi ku ifatwa rya Nzibira iherereye muri teritwari ya Walungu, yaguye mu biganza bya AFC/M23 ku wa 22 Nzeri 2025.
Ni nyuma yo gushinjwa uburangare bwatumye abasirikare ba Leta na Wazalendo batsindwa urugamba rwabereye muri uyu mujyi, uri mu y’ingenzi cyane muri Kivu y’Amajyepfo.
Ifungwa rya Lt. Gen. Masunzu ryemejwe n’umuvugizi wa FARDC, Maj. Gen. Sylvain Ekenge Bomusa, wabwiye BBC ko uyu mujenerali afunganywe n’abandi basirikare bakuru.
Ekenge yavuze ko Jenerali Masunzu afunzwe, ariko ku mpamvu z’iperereza, avuga ko atamena ibanga kuko itegeko rimubuza kwinjira mu mizi.
Yagize ati: “Nicyo gituma tutavuze amazina y’abantu bari muri iyi dosiye.”
Yanemeje ko Lt. Gen. Pacifique Masunzu yasimbuwe ku nshingano yari
afite na Maj. Gen. Nyembo Abdallah.
Umuvugizi wa FARDC aherutse kuvuga ko muri RDC hafunzwe abofisiye benshi, barimo abajenerali na colonel, bakekwaho ibyaha bikomeye cyane bijyanye n’umutekano w’Igihugu.
Yagize ati: “Bari gukurikiranwa ku bikorwa bibi bikomeye cyane bifitanye isano n’umutekano w’Igihugu.”
Mu basirikare bakuru bafunzwe harimo Gen. Christian Tshiwewe Songesha, wabaye Umugaba Mukuru w’ingabo n’umujyanama wa Tshisekedi, na Gen. Franck Ntumba, wayoboye ishami ry’igisirikare mu ngoro y’Umukuru w’Igihugu.
Like This Post? Related Posts
