• Uganda yakuriyeho ubuhungiro abakomoka muri Ethiopia, Eritrea na Somalia

Uganda yatangaje ko yahagaritse kwakira no guha ubuhungiro abaturage bakomoka muri Ethiopia, Eritrea na Somalia, isobanura ko ibyo bihugu bitarimo intambara kandi ko inkunga zagenerwaga gutunga no gufasha impunzi zikomeje kugabanyuka ku kigero kiyihangayikishije.

Ibi byatangajwe na Minisitiri ushinzwe Ubutabazi, Ibiza n’Impunzi muri Uganda, Hilary Onek, wavuze ko igihugu kidashobora gukomeza kwakira abasaba ubuhungiro baturuka mu bihugu bitarimo umutekano muke ku buryo abantu bahunga.

Ati “Nategetse abakozi bacu kudaha ubuhungiro abaturage baturuka muri ibyo bihugu kuko nta ntambara ihari, by’umwihariko abo baturuka muri Eritrea, Ethiopia na Somalia.”

Minisitiri Onek yasobanuye ko iki cyemezo gishya kireba abashya gusa, ashimangira ko abamaze kwemererwa ubuhungiro batazabwamburwa, ahubwo ko Uganda ihagaritse kwakira abashya baturuka mu bihugu bitari mu bihe by’intambara.

Minisitiri Onek yatangaje ibi mu gihe Uganda yashyikirizwaga toni 2.544 z’umuceri watanzwe na Guverinoma ya Koreya y’Epfo ku bufatanye n’Ishami ry’Umuryango w’Abibumbye ryita ku biribwa (WFP). Uwo muceri ugenewe gufasha imiryango ikennye cyane ndetse n’impunzi.

Uganda imaze igihe ishimirwa ku rwego mpuzamahanga kubera politiki yayo ifunguye kuri buri wese ushaka ubuhungiro, ariko kugabanyuka kw’inkunga mpuzamahanga gukomeje kuyitsikamira bitewe n’umubare w’impunzi wiyongera buri mwaka.

Minisitiri Onek yavuze ko ibi bikomeje “gushyira igihugu mu bibazo by’ubukungu,” cyane ko amafaranga yo gufasha impunzi yagabanyutse bikabije.

Uganda yari isanzwe ihabwa amadolari ya Amerika agera kuri miliyoni 240 buri mwaka avuye muri UNHCR. Ubu yageze kuri miliyoni 100$ gusa (ni ukuvuga Shs miliyari 361). Ni mu gihe umubare w’impunzi ifite ari hafi miliyoni ebyiri.

Ibibazo by’izi nkunga byatumye Leta ya Uganda ivuga ko idashobora gukomeza kwakira abarenze ubushobozi bwayo.

Uganda ikomeje kuza mu bihugu bya mbere ku Isi bicumbikiye impunzi nyinshi, ariko ubuyobozi bw’icyo gihugu buvuga ko nihataboneka inkunga ihagije, gukomeza iyo politiki bishobora kuzaba ikibazo gikomeye mu gihe kiri imbere.

Like This Post?

• Share On:

Related Posts

---