Yanditswe na: NSENGIYUMVA J Damascene
30/11/2025 23:29
Inzego z’ubutabazi muri Repubulika Iharanira Demokarasi ya Congo zatangaje ko abantu 19 babonwe bapfuye, 82 bararokorwa mu gihe abandi bagishakishwa nyuma y’uko ubwato bwari butwaye abantu 200 bukoze impanuka.
Ni ubwato bwakoreye impanuka mu kiyaga cya
Mai-Ndombe giherereye mu Ntara ya Mai-Ndombe, mu Burengerazuba bwa Repubulika
Iharanira Demokarasi ya Congo.
Nkoso Kevani Lebon uyobora iyo Ntara
yavuze ko iyi mpanuka yabaye ku wa Kane, ubwo ubwato bwari buvuye mu gace ka
Kiri bugana mu Murwa Mukuru Kinshasa ari mu ijoro.
Yagize ati ” Ejo hashize twabonye imirambo icyenda, uyu munsi tubona
icumi tunarokora abantu 82, ntituzi abakibura.”
Guverineri Nkoso yasobanuye ko nubwo
ubwato bwari butwaye abantu bagera kuri 200, icyateye impanuka ari umuyaga
mwinshi wateye guhagarara kwa moteri y’ubwato bugahita burohama.
Si ubwa mbere impanuka nk’izi zibaye
mu ntara ya Mai-Ndombe, kuko akenshi usanga hari ubwato bwikorera abantu
n’ibintu birenze ubushobozi bwabwo inshuro nyinshi bunashaje.
Muri Kamena abantu 86, barimo abana 21, barapfuye nyuma y’uko ubwato burohamye mu mugezi wa Kwa no muri Kanama ubwato bwari butwaye abantu 300 bukora impanuka.
